संजय गांधी राष्ट्रीय उद्यानातील चिमुकल्यांची ‘वनराणी’ पुन्हा ट्रॅकवर, कशी आहे नवी टॉय ट्रेन?

नव्या ‘वन राणी’ टॉय ट्रेनमध्ये अनेक खास गोष्टी आहेत. ही ट्रेन आता पूर्णपणे बॅटरीवर चालते, त्यामुळे तिच्यात धूर नाही, आवाज नाही. निसर्गासाठीही ती अधिक अनुकूल आहे. डब्यांना मोठ्या काचांच्या खिडक्या आणि पारदर्शक छप्पर दिलं गेलं आहे, त्यामुळे प्रवासादरम्यान झाडं, प्राणी आणि आकाश यांचं सौंदर्य सहजपणे पाहता येणार आहे. ट्रेनच्या आत आरामशीर, अगदी मेट्रोसारखी आसनव्यवस्था आहे. त्यामुळे लांबच्या प्रवासातही आराम मिळेल. डब्यांवर जंगलातील प्राणी आणि झाडांची रंगीत चित्रं देखील काढलेली आहेत, त्यामुळे ही सफर विशेषतः मुलांसाठी मजेदार आणि शैक्षणिक ठरेल.

संजय गांधी राष्ट्रीय उद्यानात प्रवेश करण्यासाठी प्रत्येक प्रौढ व्यक्तीसाठी सध्या 103 रुयपे इतकं शुल्क आकारलं जात आहे. लहान मुलांसाठी (5 ते 12 वयोगटातील) तिकीट दर कमी असून साधारणपणे 55 रुपये असणार आहे. तर 5 वर्षांखालील मुलांसाठी प्रवेश मोफत आहे. ‘वनराणी’ टॉय ट्रेनसाठी स्वतंत्र तिकीट लागतं. नव्या व्हिस्टाडोम डब्यांसह ही ट्रेन अधिक आकर्षक आणि पर्यावरणपूरक असल्यामुळे तिचं तिकीट पूर्वीपेक्षा थोडं अधिक असण्याची शक्यता आहे. याआधीच्या जुन्या ट्रेनसाठी तिकीट दर साधारण 50 ते 100 दरम्यान होते. नवीन ट्रेनसाठी अचूक दर अजून जाहीर करण्यात आलेले नाहीत.