'माझ्या इच्छेसाठी ती क्रू मेंबर झाली...', पिंकीच्या वडिलांचा आक्रोश, अजितदादांसोबत मुलगी गमावली!

विमान अपघातानंतर मुंबईच्या वरळी भागात राहणाऱ्या पिंकी माळी यांच्या घरी एकच आक्रोश पाहायला मिळत आहे. पिंकीसोबत रात्री बोलणं झालं होतं, आई सकाळी बोलू, असं पिंकी म्हणाली होती, अशी हृदयद्रावक प्रतिक्रिया पिंकीच्या आईने दिली आहे.

'पिंकीला मॉडेलिंगमध्ये करिअर करायचं होतं, पण तिने या क्षेत्रात जावं अशी माझी इच्छा होती. आज असं वाटतंय की मी हा हट्ट का केला?' ही प्रतिक्रिया देताना पिंकीच्या वडिलांना अश्रू अनावर झाले.

29 वर्षांच्या पिंकी माळीला विमान उड्डाण क्षेत्रात 6 वर्षांचा अनुभव आहे. मागच्याच वर्षी पिंकी व्हीसीआर कंपनीमध्ये कामाला लागली. त्याआधी पिंकी सांताक्रुझ आंतरराष्ट्रीय विमानतळावर काम करत होती. दोन वर्षांपूर्वी पिंकीचं लग्न झालं होतं आणि ती पतीसोबत ठाण्यात राहायची.

पिंकीचे वडील शिवकुमार हे दिल्ली विमानतळावर कामाला होते, पण त्यांना कामावरून काढण्यात आलं होतं. तेव्हापासूनच शिवकुमार यांची इच्छा होती की पिंकीने विमान उड्डाण क्षेत्रात करिअर करावं. अजित पवारांना बारामतीमध्ये सोडून पिंकी पुढे नांदेडला जाणार होती. तिला मॉडेलिंग क्षेत्रात करिअर करायचं होतं, जयपूरमध्ये ग्रॅज्युएशन करायचं होतं, यासाठी एक लाख रुपये खर्च येणार होता. हा खर्च करण्याची तिची तयारी होती, असं कुटुंबाने सांगितलं आहे.