एक रहेंगे तो सेफ रहेंगे, महाराष्ट्रातल्या पहिल्या सभेत PM मोदींचा नारा, म्हणाले, मविआच्या गाडीला...

धुळे : महायुतीच्या उमेदवारांसाठी राज्यात पंतप्रधान नरेंद्र मोदी यांची आज धुळ्यात सभा झाली. धुळ्यातील सभेत पंतप्रधान नरेंद्र मोदी यांनी महायुतीच्या उमेदवारांना निवडून देण्याचं आवाहन करताना महाविकास आघाडीवर जोरदार घणाघात केला. धुळ्याची ही धरती आणि महाराष्ट्राशी माझं नातं सर्वजण ओळखता. महाराष्ट्राकडे जेव्हा जेव्हा मी काही मागितलंय तेव्हा मोठ्या मनाने मला ते दिलंय असं म्हणत पंतप्रधान नरेंद्र मोदी यांनी भाषणाला सुरुवात केली. ते म्हणाले की, २०१४ मध्ये मी धुळ्यात आलो होतो. मी तुम्हाला महाराष्ट्रात भाजप सरकारसाठी आग्रह केला होता. तुम्ही महाराष्ट्रात १५ वर्षांच्या सत्तेला सुरुंग लावत भाजपला मोठा विजय मिळवून दिलात. पुन्हा एकदा मी धुळ्यात आलो आहे. इथूनच महाराष्ट्रात निवडणूक प्रचाराची सुरुवात करत आहे. तुमचं हे प्रेम, इतक्या मोठ्या संख्येनं सभेसाठी तुम्ही आला आहात. हे उत्साह वाढवणारा आहे.