बारामतीत पवार कुटुंबाची बैठक, रोहित पवारांनी दिली तारीख, दादांच्या अपघाताबद्दल गौप्यस्फोट करणार?

पवार कुटुंबीयांच्या बैठकीत कोणतीही राजकीय चर्चा झाली नाही. विद्या प्रतिष्ठानमध्ये अजित पवारांचं स्मारक उभं राहावं, याबाबत चर्चा झाली. त्यांचं इथं म्यूझियम बनवावं, अशी देखील लोकांची मागणी आहे, अशी माहिती रोहित पवारांनी दिली. यावेळी त्यांनी राष्ट्रवादी काँग्रेसच्या विलीनीकरणावर देखील भाष्य केलं.

बारामतीतील विद्या प्रतिष्ठानमध्ये पार पडलेल्या बैठकीबद्दल माहिती देताना रोहित पवार म्हणाले की, "२८ जानेवारी पासून परिवारात कोणतीही राजकीय चर्चा झाली नाही. या दु:खद काळात आम्ही एखादी राजकीय भूमिका घेणं, हे आमच्यासाठी भावनिक दृष्टीकोनातून अवघड जातंय. ९ तारखेनंतर स्पष्टपणे आपल्याला या सगळ्या गोष्टींवर बोलता येईल."

"शेवटी दादांची इच्छा काय होती? काय गोष्टी घडल्या? हे कुठंतरी लोकांपर्यंत गेल्या पाहिजेत. विलीनीकरण होईल की नाही होईल, इतपत भाष्य करण्याएवढा मी मोठा नेता नाही. पण राजकीय दृष्टीकोनातून ज्या आरोपी प्रत्यारोपाच्या चर्चा आहेत. याचं कुठंतरी दु:ख वाटतं. अजितदादांसारखा एवढा मोठा माणूस त्यांच्या मनात नेमकं काय? याची चर्चा कुणीच दुर्दैवाने करत नाही. चर्चा दुसरीकडेच कुठेतरी भरकटत चालली आहे, याला मोठ मोठ्या नेत्यांनी राजकीय स्वरुप दिलंय, हे परिवारातील एक व्यक्ती म्हणून दु:ख वाटतं", असंही रोहित पवार म्हणाले.