बेलापूरच्या आमदार मंदा म्हात्रे यांना हृदयविकाराचा झटका, अपोलो रुग्णालयात उपचार सुरू

मंदा म्हात्रे यांना रुग्णालयात दाखल केल्याचे समजताच राज्याचे उपमुख्यमंत्री एकनाथ शिंदे यांनी थेट व्हिडिओ कॉल करून मंदा म्हात्रे यांच्याशी संवाद साधला आणि त्यांच्या प्रकृतीची चौकशी केली.  मंदाताई, आपण तब्येतीची पूर्ण काळजी घ्या. मतदारसंघातील जनतेचे आशीर्वाद आपल्या सोबत आहेत, त्यामुळे आपल्याला काहीही होणार नाही. आपण लवकरच पूर्ण बऱ्या होऊन पुन्हा जनसेवेसाठी कार्यरत व्हाल, अशा शब्दांत शिंदेंनी त्यांना दिलासा दिला.

मंदा म्हात्रे यांना रुग्णालयात दाखल केल्याची माहिती मिळताच अपोलो रुग्णालयाबाहेर कार्यकर्त्यांनी आणि समर्थकांनी मोठी गर्दी केली होती. मात्र, रुग्णालयाने संसर्गाचा धोका टाळण्यासाठी कोणालाही भेटू न देण्याचा निर्णय घेतला आहे. म्हात्रे या नवी मुंबईतील राजकारणातील एक कणखर नेतृत्व म्हणून ओळखल्या जातात, त्यामुळे त्यांच्या प्रकृतीसाठी विविध ठिकाणी प्रार्थना केली जात आहे.

रुग्णालय प्रशासनाकडून मिळालेल्या प्राथमिक माहितीनुसार, मंदा म्हात्रे यांच्यावर मध्यरात्री मंदा म्हात्रे यांच्यावर शस्त्रक्रिया पार पडली. तब्येत उत्तम असल्याचा डॉक्टरांकडून सांगण्यात आले आहे. आवश्यक त्या सर्व वैद्यकीय चाचण्या करण्यात आल्या असून त्यांची प्रकृती आता धोक्याबाहेर आहे. त्यांना काही दिवस सक्तीच्या विश्रांतीचा सल्ला देण्यात आला आहे.