'हीच तुझी लायकी', धाराशिवमध्ये भाजपकडून बॅनरबाजी, ओमराजे अन् राणा पाटील यांच्यातील वाद पेटणार!

धाराशिव शहराअंतर्गत रस्त्याच्या विकास निधी थांबवल्याचा वाद धाराशिव शहरात पेटला असून पक्षप्रवेश करतो, असे सांगून शहरातील विकास निधी पालकमंत्र्याकडून थांबून घेतला, हीच तुझी लायकी म्हणत धाराशिव शहरात चौका चौकात भारतीय जनता पार्टी कडून बॅनर लावण्यात आले आहेत. या बॅनरच्या माध्यमातून त्यांनी खासदार ओमराजे निंबाळकर यांच्यावर निशाणा साधला आहे.

लायकी शब्दावरून काही दिवसापूर्वी याच मुद्याला घेऊन राणा पाटील व खासदार ओमराजे निंबाळकर यांच्यात जुंपली होती. आता चक्क भाजपने चौका चौकात बॅनर लावत ओमराजे यांच्यावर निशाणा साधला आहे. तर विरोधकाच्या अप्रचाराला पालकमंत्री बळी पडले आणि त्यांनी विकास निधीला स्थगिती दिली. त्यामुळे आता भारतीय जनता पार्टी मुख्यमंत्री देवेंद्र फडणवीस यांच्याकडे दाद मागणार असल्याचं भाजपकडून सांगण्यात येत आहे.

पक्षप्रवेश करतो असे सांगून पालकमंत्र्याकडे भीक मागून.... धाराशिवचा विकास निधी थांबवण्याचा प्रयत्न करणारा... हीच तुझी लायकी... आशयाचे बॅनर धाराशिव शहरात लागले आहेत.

मिळालेल्या माहितीनुसार, धाराशिवमध्ये 18 महिन्यांपूर्वी 170 कोटींच्या कामाच्या विकासनिधीवर स्थगिती आणण्यात आली होती. आगामी स्थानिक स्वराज्य संस्थांच्या निवडणुकीच्या तोंडावर दोन दिवसांपूर्वी ही स्थगिती उठवण्यात आली. आमदार राणा पाटील यांच्या प्रयत्नातून ही स्थगिती उठवली होती. पण अवघ्या दोन दिवसात धाराशिवचे पालकमंत्री प्रताप सरनाईक यांनी स्वतः नगर विकास खात्याकडे तक्रार करून या कामावर पुन्हा स्थगिती आणली. याच मुद्द्यावरून महायुती मधील पालकमंत्री प्रताप सरनाईक व भाजप आमदार राणा पाटील यांच्यात वाद सुरू झाला होता. याच वादात आता बॅनर लावत खासदार ओमराजे निंबाळकर यांच्यावरही निशाणा साधला आहे.