आधी बडगुजरांना विरोध केला, आता भाजप आमदाराला मोठा धक्का, दीराचा दारुण पराभव

प्रभाग क्रमांक २५ मध्ये भाजपने ठोस यश संपादन केले आहे. भाजपचे सुधाकर बडगुजर यांनी मोठ्या मताधिक्याने विजय मिळवला असून, त्यांच्या सोबत साधना मटाले यांनीही बाजी मारली आहे. या निकालानंतर भाजप कार्यकर्त्यांमध्ये जल्लोषाचे वातावरण पाहायला मिळत आहे. मात्र, याच प्रभागातील उर्वरित दोन जागांवर शिवसेना शिंदे गटाच्या कविता नाईक आणि शिवसेना ठाकरे गटाचे मुरलीधर भांबरे यांनी विजय मिळवला आहे.

शिवसेना शिंदे गटानेही या निवडणुकीत आपले खाते उघडत चार जागांवर विजय मिळवला आहे. प्रभाग क्रमांक १६ मधून राहुल दिवे, आशा तडवी, पूजा नवले आणि ज्योती जोंधळे यांनी विजय संपादन केला आहे. या यशामुळे शिंदे गटाच्या कार्यकर्त्यांमध्ये उत्साह संचारला असून पुढील निकालांकडे उत्सुकतेने पाहिले जात आहे.

तब्बल पावणेचार वर्षांपासून रखडलेली नाशिक महानगरपालिकेची निवडणूक अखेर निर्णायक टप्प्यावर पोहोचली आहे. गुरुवारी (दि. १५ जानेवारी) शहरात मतदान प्रक्रिया पार पडली आणि आज निकाल जाहीर होत आहेत. दीर्घ प्रतीक्षेनंतर झालेल्या या निवडणुकीकडे संपूर्ण नाशिकचे लक्ष लागले होते. विशेष म्हणजे १२२ पैकी तब्बल १५ प्रभागांमध्ये अत्यंत अटीतटीची लढत झाल्याने निकालाबाबत प्रचंड उत्सुकता निर्माण झाली होती.

या निवडणुकीत १२२ पैकी तब्बल ९६ जागांवर भाजप आणि शिवसेना शिंदे गटामध्ये थेट लढत रंगली. भाजपने स्वबळावर निवडणूक लढवली, तर शिंदे गटाने राष्ट्रवादी काँग्रेस (अजित पवार गट) आणि रिपब्लिकन सेना यांच्यासोबत युती केली होती. दुसरीकडे महाविकास आघाडीनेही आपली ताकद पणाला लावली. भाजप, शिंदेसेना, राष्ट्रवादी अजित पवार गट, शिवसेना ठाकरे गट, मनसे, काँग्रेस, राष्ट्रवादी शरद पवार गट यांच्यासह तब्बल २०८ अपक्ष उमेदवारही निवडणूक रिंगणात होते.