Maratha Reservation : मराठवाड्यात मराठ्यांना आरक्षण मिळणार? 1 लाख प्राध्यापक लागले कामाला

जालना जिल्ह्यातील अंतरवाली येथे मनोज जरांगे पाटील यांनी आंदोलन सुरू करून ओबीसी मधून आरक्षण देण्याची मागणी केली. त्यावेळी मराठवाडा विभागात कुणबी समाज असून आरक्षण मिळू शकतो अशी मागणी होऊ लागली. त्यामुळे आता या विभागात कुणबी असणाऱ्या नोंदी तपासण्याचे निर्देश राज्य सरकारकडून देण्यात आले. हे काम जिल्हा परिषद शाळेतील मुख्याध्यापकांना सोपवण्यात आले आहे. बुधवार आणि गुरुवार या दोन दिवसात या सर्व नोंदणीच्या प्रती जिल्हा परिषदकडे देण्याचे निर्देश देण्यात आले आहेत. त्यानुसार जवळपास एक लाख मुख्याध्यापक कामाला लागले असल्याची माहिती माध्यमिक प्राथमिक शिक्षक संघाचे जिल्हाध्यक्ष आणि मुख्याध्यापक राजेश हिवाळे यांनी दिली.

मराठवाड्यातील मराठा समाजाची कुणबी नोंद कुठे कुठे आणि किती प्रमाणात आहे? याचा तपशील घेऊन तात्काळ सादर करण्यात यावा. असा आदेश मराठवाड्यातील आठही जिल्ह्यात धडकताच गावा गावातील शिक्षण यंत्रणा कामाला लागली व त्यांच्या शाळेतील निर्गम उतारावर आणि शाळेच्या दाखल्यावर "कुणबी" नोंदी असणारें दाखले हुडकून काढत ती माहिती तात्काळ Google Link वरती भरून शासनाला पाठवण्यास सुरुवात केली आहे. पहिल्या दिवशी मिळालेल्या माहिती नुसार 14,00,000 (चौदा लाख) विद्यार्थ्यां पैकी 38000 (आडतीस हजार) कुणबी असल्याचे समोर आले आहे. शासनाने मागवलेली माहिती ही थातूर मातुर स्वरूपाची किंवा काम कुचराईपणामुळे "निरंक" गेली ही बाब पुढे चालुन मराठवाड्यातील मराठा समाजाची कुणबी असणारी नोंद या विषयावर न्यायलयात टिकवण्यासाठी जिकरीची राहू शकते, त्यामुळे मेहनत घेऊन लक्षपूर्वक डोळ्यात तेल घालून काम करत असल्याची माहिती जिल्हाध्यक्ष आणि मुख्याध्यापक राजेश हिवाळे यांनी दिली.