आई-बाबांसोबतची शेवटची भेट अधुरीच राहिली, गावी निघालेल्या 2 भावंडांना रस्त्यातच काळाने गाठलं, छ. संभाजीनगरमधील घटना

छत्रपती संभाजीनगर : आडगाव बुद्रुकजवळ शनिवारी रात्री झालेल्या भीषण अपघातात गावाकडे येत असलेल्या दोन भावंडांचा दुर्दैवी मृत्यू झाला. गणेश संजय सुरडकर (30) आणि त्याची बहीण निशा सुरडकर (25) हे दोघेही नोकरीनिमित्त छत्रपती संभाजीनगरात राहत होते. रविवारी सुटी असल्याने ते शनिवारी सायंकाळी सातच्या सुमारास दुचाकीने (एमएचक्यू 3260) गावाकडे निघाले होते. मात्र आडगाव बुद्रुकजवळ समोरून आलेल्या पिकअपने त्यांच्या दुचाकीला जबर धडक दिली. धडक इतकी भीषण होती की गणेशचा जागीच मृत्यू झाला, तर गंभीर जखमी झालेली निशा रुग्णालयात दाखल असताना रविवारी पहाटे उपचारादरम्यान मृत्यू पावली. करंजखेडा येथे दोघांचेही रविवारी एकाचवेळी अंत्यसंस्कार करण्यात आले.