सहा वर्षांपूर्वी घर सोडलं, अनेकांनी फसवलं, ‘ती’ ओरडतच मंदिरात आली अन् आयुष्य बदललं, संभाजीनगरात काय घडलं?

‎हर्सूल पोलिस ठाण्याच्या हद्दीत गजानन महाराज मंदिर असून तिथे सप्ताहाचा कार्यक्रम सुरू होता. एक तरुणी अचानक तेथे आली आणि जोरजोरात आरडाओरड करू लागली. उपस्थितांनी तातडीने पोलिसांना माहिती दिली. पोलिसांनी तिला ताब्यात घेत शासकीय रुग्णालयात प्रथमोपचारासाठी दाखल केले. तपासणीनंतर डॉक्टरांनी ती मनोरुग्ण असल्याचे स्पष्ट केले. त्यानंतर पोलिसांनी तिला माणुसकी वृद्ध सेवालयात दाखल केले.

‎या भेटीवेळी तरुणीच्या आईने भावूक होत सांगितले की, “सहा वर्षांपासून आम्ही तिचा शोध घेत होतो. ती कोणालाही काही न सांगता घरातून निघून गेली होती. तिच्या जाण्यानंतर तिच्या वडिलांचे निधन झाले. एक मुलगा सैन्यात कर्तव्यावर आहे.” आईला पाहताच तरुणीच्या डोळ्यांत आनंदाश्रू तरळले. तिने आईला घट्ट मिठी मारली आणि “आता मी कुठेही जाणार नाही,” असा शब्द दिला.

‎यावेळी पोलिस उपनिरीक्षक वसंतराव शेळके यांनी सांगितले की, ‎“एखाद्या अधिकाऱ्याकडे अधिकृत तपास नसला तरी सामाजिक जबाबदारी म्हणून काम केल्यास त्याला यश नक्की मिळते. ही तरुणी सहा वर्षांपूर्वी जालना पोलिस ठाण्यात मिसिंग म्हणून नोंद होती. तिची बहीण मुंबईत राहत असल्याचे समजताच तातडीने संपर्क साधला आणि नातेवाईकांची भेट घडवून आणली. या संपूर्ण प्रक्रियेत माणुसकी समूहाची मोठी मदत झाली.” तसेच, माणुसकी समूहाने आतापर्यंत तब्बल 40 बेवारस व्यक्तींना त्यांच्या नातेवाईकांपर्यंत सुरक्षित पोहोचवले असल्याची माहितीही त्यांनी दिली.