BAMU मध्ये प्राध्यापकांच्या 73 पदांसाठी नव्याने भरती प्रक्रिया सुरू, राज्य सरकारने दिले 'हे' महत्त्वाचे निर्देश

डॉ. बाबासाहेब आंबेडकर मराठवाडा विद्यापीठाने ऑगस्ट 2023 मध्ये प्राध्यापकांच्या 73 पदांची भरती प्रक्रिया सुरू केली होती. त्यावेळी या पदांसाठी तब्बल 5815 उमेदवारांनी अर्ज केले होते. मात्र, या अर्जाची छाननी करण्यापूर्वी राजभवनकडून या भरतीला स्थगिती देण्यात आली. तत्कालीन कुलगुरू डॉ. प्रमोद येवले यांचा कार्यकाळ संपताना ही भरती प्रक्रिया राबविली जात असल्याने अनेकांनी त्यावर आक्षेप घेतला होता. त्याची दखल घेत राजभवनने ही स्थगिती दिली होती. आता वर्षभरानंतर ही प्रक्रिया नव्याने राबविण्याचा निर्णय घेण्यात आला आहे. विद्यापीठ व्यवस्थापन परिषदेच्या सोमवारी झालेल्या बैठकीत तसा निर्णय घेण्यात आला.