निवृत्त कर्मचाऱ्याची कमाल, गच्चीवर उभारली सुंदर बाग, पर्यावरणपूरक जीवनशैलीचा दिला अनोखा संदेश‎

या टेरेस गार्डनमध्ये विविध प्रकारची फळझाडे, ताज्या भाज्यांची लागवड, रंगीबेरंगी फुलझाडे तसेच आयुर्वेदिक वनस्पतींचा समावेश आहे. नीट नियोजन आणि सातत्यपूर्ण काळजीमुळे ही बाग वर्षभर टवटवीत राहते. विशेष म्हणजे, सध्या कडक उन्हाळा सुरू असतानाही त्यांच्या गच्चीवरील झाडे हिरवीगार दिसतात. पाण्याची कमतरता भासू नये म्हणून बुरांडे टँकरद्वारे पाणी विकत घेऊन झाडांना नियमित पाणी देतात. त्यामुळे या बागेतील प्रत्येक रोप निरोगी आणि ताजेतवाने दिसते.

याचबरोबर, त्यांनी घरातील टाकाऊ वस्तूंना नवा जीव देत अनेक उपयुक्त आणि सजावटीच्या वस्तू तयार केल्या आहेत. नारळाच्या करवंटीपासून आकर्षक वस्तू, वाळलेल्या भोपळ्यापासून बनवलेले साहित्य, तसेच इतर टाकाऊ वस्तूंपासून तयार केलेल्या कलाकृती त्यांच्या सर्जनशीलतेची साक्ष देतात. त्यांच्या घरातील भिंतींवर त्यांनी स्वतः काढलेल्या चित्रांनी एक वेगळेच कलात्मक वातावरण निर्माण केले आहे.

निसर्गप्रेम, सर्जनशीलता आणि पर्यावरणपूरक दृष्टिकोन यांचा सुंदर संगम त्यांच्या या उपक्रमातून दिसून येतो. शहरात राहूनही हिरवाई जपता येते आणि टाकाऊ वस्तूंमधूनही नवनिर्मिती करता येते, याचा आदर्श त्यांनी घालून दिला आहे.