CBSE बोर्डाकडून ‘CTET’च्या तारखा जाहीर; परीक्षा केव्हा, अर्ज कसा करायचा? माहिती Detail मध्ये

इच्छुक उमेदवारांना परीक्षेचे तपशील, अभ्यासक्रम, भाषा, पात्रता निकष, परीक्षा शुल्क, परीक्षेचे शहर आणि महत्त्वाच्या तारखा यासंबंधीची सविस्तर माहिती CTETच्या अधिकृत वेबसाइटवर उपलब्ध असेल. डिसेंबर 2026 च्या नोंदणीसाठी, उमेदवारांनी ctet.nic.in या अधिकृत वेबसाइटवर जावे. 'apply for CTET 2026' या लिंकवर क्लिक करावे. नोंदणी पूर्ण करून सर्व वैयक्तिक आणि शैक्षणिक तपशील भरावेत. परीक्षा केंद्र, पेपर (I किंवा II, किंवा दोन्ही) आणि प्राधान्याची भाषा निवडावी. उमेदवारांनी त्यांच्या पासपोर्ट-आकाराचा फोटो आणि सही आवश्यक फॉरमॅटनुसार अपलोड करावी. त्यानंतर अर्ज सादर करावा.

परीक्षेचा अर्ज भरतानाच उमेदवारांना अर्ज शुल्क भरावा लागणार आहे. अर्ज शुल्क जो पर्यंत भरणार नाही, तोपर्यंत उमेदवारी कन्फर्म होणार नाही आणि हॉलतिकिट सुद्धा मिळणार नाही. खुल्या प्रवर्गातील उमेदवारांना आणि ओबीसी उमेदवारांना एका पेपरसाठी 1000 रुपये आणि दोन्ही पेपरसाठी 1200 रुपये इतकं शुल्क आकारलं जाणार आहे. तर, एससी, एसटी आणि पीडब्ल्यूडी उमेदवारांसाठी एका पेपरसाठी 500 रुपये आणि दोन्ही पेपरसाठी 600 रुपये इतके अर्ज शुल्क आकारले जाणार आहे.

'सीटीईटी' परीक्षा यावर्षी डिसेंबरमध्ये अपेक्षित आहे. 'सीटीईटी' परीक्षा दोन पेपरमध्ये विभागलेली आहे. पेपर I हा इयत्ता 1ली ते 5वी पर्यंत शिकवू इच्छिणाऱ्या शिक्षकांसाठी आहे, तर पेपर II हा इयत्ता 6वी ते 8वी पर्यंत शिकवू इच्छिणाऱ्यांसाठी आहे. परीक्षेत 150 बहुपर्यायी प्रश्न (MCQs) असतील आणि नकारात्मक गुणदान पद्धती नाही. नकारात्मक गुणदान पद्धत नसल्यामुळे उमेदवारांसाठी ही जमेची बाजू आहे. सीटीईटी परीक्षेची तयारी करणाऱ्या उमेदवारांना ही परीक्षा पद्धत माहित असणे महत्त्वाचे आहे.