Dahi Handi : महाराष्ट्रात दहीहंडीच्या उत्साहाला गालबोट, गोविंदाची मृत्यूसोबतची झुंज अपयशी

जळगाव : मंगळवारी राज्यभरात दहीहंडी मोठ्या उत्साहात साजरी करण्यात आली, पण जळगावच्या पाचोऱ्यात दहीहंडीच्या उत्सवाला गालबोट लागलं आहे. पाचोऱ्यात गोविंदाची मृत्यूशी झुंज अपयशी ठरली आहे. उपचारादरम्यान आज अखेर गोविंदाची प्राणज्योत मालवली आहे.

पाचोरा शहरातील रेल्वे स्टेशन रोडवरील दहीहंडीत 35 वर्षीय गोविंदा पडल्याने जखमी झाला होता. यानंतर त्याला रुग्णालयात दाखल करण्यात आलं होतं. पाचोरा शहरातील रिक्षा स्टॉप सह स्टेशन रोड परिसरात युवकांनी दहीहंडीचं आयोजन केलं होतं. यावेळी गोविंदा पथकातील नितीन पांडुरंग चौधरी हा 32 वर्षांचा गोविंदा दहीहंडी फोडताना खाली पडला.

जखमी झाल्यानंतर नितीन चौधरीला तात्काळ रुग्णालयात दाखल करण्यात आलं. पण आज 28 ऑगस्ट रोजी त्याची मृत्यूसोबतची झुंज अपयशी ठरली. नितीन चौधरीच्या मृत्यूने शहरात शोककळा पसरली आहे.