Dahisar Toll Plaza: वाहतूक कोंडीचा प्रश्न कायमचा सुटणार! 'या' टोलनाक्याची आता जागाच बदलणार

मुंबई: महानगरी मुंबईमध्ये वाहतूक कोंडी ही नित्याची समस्या झाली आहे. ठिकठिकाणी होणारी वाहतूक कोंडी कमी करण्यासाठी प्रशासनाच्यावतीने जोरदार प्रयत्न सुरू आहेत. दररोजच्या वाहतूककोंडीचे केंद्र ठरणाऱ्या दहिसर टोल नाक्याबाबत एक मोठा निर्णय घेण्यात आला आहे. दहिसर टोल नाक्याचं स्थलांतर करण्यास मंजुरी देण्याचा प्रस्ताव महाराष्ट्र राज्य रस्ते विकास महामंडळाने (एमएसआरडीसी) राष्ट्रीय महामार्ग प्राधिकरणाला सादर केला आहे. या प्रस्तावात वसईच्या बाजूने वर्सोवा उड्डाणपुलापूर्वी टोल नाक्याचं स्थलांतर करण्याची शिफारस करण्यात आली आहे. त्यामुळे दहीसर टोलनाका हा वसई-विरार महापालिकेच्याहद्दीत मुंबई-अहमदाबाद महामार्गावर स्थलांतरित होण्याची दाट शक्यता आहे.