शिवभक्त शेतकरी! 50 लाखांचा बंगला बांधला, त्यावर छत्रपती शिवरायांचा अश्वारुढ पुतळा उभारला!

धाराशिव: छत्रपती शिवाजी महाराज यांना अखंड महाराष्ट्राचं दैवत मानलं जातं. त्यामुळे महाराष्ट्रातील प्रत्येक शहरात आणि अगदी गावांमध्येही शिवरायांचे पुतळे पाहायला मिळतात. मात्र, सध्या धाराशिवमधील एका शिवभक्त शेतकऱ्याची सर्वत्र चर्चा आहे. कोरडवाहू शेतकरी भागवत शितोळे यांनी आधुनिक शेतीची कास धरली आणि शेतातून चांगले उत्पन्न मिळवले. शेतीच्या उत्पन्नातून त्यांनी आपल्या शेतातच 50 लाखांचा बंगला बांधला. विशेष म्हणजे या बंगल्यावर त्यांनी छत्रपती शिवाजी महाराजांचा 11 फूट उंच आणि 10 फूट लांब असा अश्वारुढ पुतळा उभारला आहे.

शितोळे कुटूंब हे मुळचं शेतकरी असून कळंब तालुक्यातील नायगाव येथे त्यांची 15 एकर कोरडवाहू शेती होती. संपूर्ण कुटूंब उच्चशिक्षित असलं तरी नोकरी नव्हती. कोरडवाहू शेती असल्याने उत्पन्नाचं साधन नव्हतं. तेव्हा भागवत शितोळे यांनी आधुनिक शेतीचा मार्ग पत्करला. आपल्या शेतात जरबेरा, ऊस आणि इतर नगदी पिके घेतली. यातून त्यांना चांगलं उत्पन्न मिळालं. परिस्थिती बदलली आणि त्यांनी आपल्या शेतात बंगला बांधण्याचा निर्णय घेतला.

दरम्यान, शितोळे कुटुंबाने आपल्या बंगल्यावर उभारलेला छत्रपती शिवाजी महाराज यांचा पुतळा पंचक्रोशितच नव्हे तर महाराष्ट्रभर चर्चेचा विषय ठरतोय. सोशल मीडियावरही या घराचा व्हिडिओ व्हायरल झाला आहे.