छत्रपती शिवाजी महाराजांच्या नावावरुन नवीन वनस्पतीने नामकरण, संशोधकांनी शिवरायांप्रती व्यक्त केली कृतज्ञता

संशोधनाच्या या कार्यात कोल्हापूरच्या न्यू कॉलेजमधील वनस्पतीशास्त्र विभागातील अक्षय जंगम, रतन मोरे, डॉ. निलेश पवार, नाशिकच्या चांदवड येथील डॉ. शरद कांबळे आणि शिवाजी विद्यापीठामधील प्राध्यापक डॉ. एस. आर. यादव यांचा समावेश होता. गेल्या 6 वर्षांपासून अक्षय जंगम आणि डॉ. निलेश पवार हे कोल्हापूर जिल्ह्यातील किल्ल्यांवर आढळणाऱ्या वनस्पतींचा अभ्यास करत आहेत. याच संशोधनाच्या कामावेळी ऑगस्ट 2023 मध्ये ही कंदीलपुष्प वर्गातील एक वेगळी वनस्पती विशाळगडावर आढळली होती.

या संशोधन कार्यातील डॉ. शरद कांबळे हे भारतामधील कंदीलपुष्प वर्गाच्या तज्ञ असून मूळचे कोल्हापूरचे पण सध्या नाशिक येथे कार्यरत आहेत. त्यांनी पाहणीअंती ही एक नवीन प्रजाती असू शकते असे मत व्यक्त केले. पुढे शिवाजी विद्यापीठातील वनस्पती शास्त्रज्ञ प्रा. एस. आर. यादव यांची याबाबत संशोधन केले. यादव यांनीच अख्ख्या भारतात सेरोपेजिया वर्गाला विशेष ओळख मिळवून दिली असून आत्तापर्यंत त्यांनी या वर्गातील एकूण 6 नवीन प्रजाती शोधल्या आहेत. शेवटी निरीक्षणाअंती ही वनस्पतीची एक नवीन प्रजाती म्हणून घोषित होऊ शकते, हे स्पष्ट झाल्यानंतर यासंदर्भातील शोधनिबंध आतंरराष्ट्रीय नियतकालिकात पाठवण्यात आला.