500 रुपयांना बैल गहाण ठेवला अन् अयोध्येला गेलो, शेतकऱ्यानं सांगितला 'तो' प्रसंग, Video

अयोध्येत राम मंदिराची प्राणप्रतिष्ठा होत असताना डोकेवाडीतील कारसेवकांनी आपल्या आठवणींना उजाळा दिला. 1990 मध्ये कारसेवेसाठी डोकेवाडीतून 11 जण अयोध्येला निघाले. 11 पैकी 4 जण मागे राहिले होते तर बाकी पुढे गेले. मागे राहिलेल्यांना अयोध्येत पोहोचण्यापूर्वीच अटक करण्यात आली. यामध्ये 16 वर्षीय ज्ञानदेव वासुदेव पवार, विक्रम गोविंद डोके, अर्जुन सदाशिव आहेर आणि गोरख उत्तरेश्वर खैरे यांचा समावेश होता. त्यांना 21 दिवसांची जेलची हवा खावी लागली आणि त्यानंतर जामीन मिळाला, असे त्यांनी सांगितले.

डोकेवाडीतून कारसेवेसाठी गेलेली ही मंडळी सर्वसामान्य कुटुंबातली होती. त्यातील भगवान दगडू खैरे या शेतकऱ्याकडे अयोध्येला जाण्यासाठी पैसे नव्हते. त्यामुळे त्यांनी स्वतःचा बैल एका खाजगी सावकाराकडे 500 रुपयांना गहाण ठेवला आणि अयोध्येला गेले. अयोध्येतून परत आल्यानंतर पैसे परत करून बैल खाजगी सावकाराकडून सोडवला, अशी माहिती भगवान खैरे यांनी दिली.

अयोध्येत होत असलेल्या राम मंदिरासाठी देशभरातील अनेक कारसेवकांनी प्रयत्न केले. या सर्वांच्या प्रयत्नांना यश आले आहे. त्यामुळे आम्ही आनंदी आहोत, असे डोकेवाडीतील कारसेवकांनी सांगितले. तसेच सर्वांनी एकत्र येत हा आनंद साजरा केला.