डोंबारी खेळ बंद पडल्यानं मोलमजूरी करण्याची वेळ, पोटाची खळगी भरण्यासाठी कुटूंब वारीत सहभागी! नेमकं काय करताय?

धाराशिव : अनेकदा आयुष्यात असे काही प्रसंग येतात की पारंपरिक व्यवसाय बंद पडतो आणि कुटुंबावर मोठं संकट येतं. पण त्यातूनही न खचता काही जण या कठीण परिस्थितीतून मार्ग काढतात. अशीच काही घटना समोर आली आहे.

परंपरेने आणी पिढ्यानपिढ्या चालत आलेला डोंबारीचा खेळ बंद झाला आणि डोंबारी समाजातील हे कुटुंब उघड्यावर आले. मात्र, जिवंत जगण्याची आणि काहीतरी करून दाखवण्याची जिद्द मनात होती. म्हणून आता श्री संत एकनाथ महाराजांच्या पालखी सोहळ्यात हेच डोंबारी कुटुंब फुगे विकण्याचं काम करत आहे आणि त्यातून त्यांना चांगले उत्पन्न देखील मिळत आहे.

अहमदनगर जिल्ह्यातील शेवगाव तालुक्यातील अर्जुन फुलचंद जाधव व त्यांचे कुटुंबीय यांचा परंपरेने डोंबारी व्यवसाय होता. डोंबाऱ्याचे खेळ करून उदरनिर्वाह भागवणाऱ्या जाधव कुटुंबीयांचा डोंबारी व्यवसाय कालांतराने बंद पडला. त्यामुळे त्यांना मोल मजुरी करण्याची वेळ आली.