पांडुरंगाच्या वारीतही योगा, यातून भक्तीचा मार्ग सुखकर..., वारकऱ्यांनी व्यक्त केल्या 'या' भावना

पुणे : योगाचा नेहमीच शारीरिक, मानसिक आणि आध्यात्मिक फायद्यांसाठी उपयोग केला जातो. योग हे शारीरिक आणि मानसिक दृष्ट्या मानवजातीसाठी वरदान आहे, असं फार पूर्वीपासून सांगण्यात येतं आहे. सध्या वारकरी हे वारीत सहभागी झाले आहेत. अनेक मैलांचा प्रवास करून विठुरायांच्या चरणी माथा टेकवण्यासाठी त्यांनी पंढरपूरची वाट धरली आहे. या वाटेवर वारकऱ्यांना योगाअभ्यास देखील शिकवला जात आहे. विशेष म्हणजे वारकरीही त्यात आनंदाने सहभागी होत आहेत.

योगाशिक्षक असलेले यशवंत बेलके हे मागील 25 वर्षांपासून वारीत सहभागी होत आहेत. ते वारीमधील वारकऱ्यांना योगा, विविध आसने करायच सांगत आहेत. संथपणे हवा खेळती असलेली जागा, आवाजाचे प्रदूषण नसलेली, माणसांची ये जा नसेल अशाठिकाणी शिवाय योगासने विना अडथळा करण्याइतकी मोठी जागा शोधत ते पांडुरंगाच्या भक्तांना योगाभ्यास शिकवत आहेत.