जिल्हा परिषदेची ही शाळा म्हणजे एकच नंबर, उपक्रमांची सरकारनेही घेतली दखल!

धाराशिव : सध्या अनेकदा जिल्हा परिषदेच्या म्हणजे मराठी शाळांबाबत तक्रार केली जाते. तिथली परिस्थिती, शिक्षकांची कमतरता आणि इतर व्यवस्था तसेच शिक्षणाचा दर्जा याबाबत पालकांमध्ये एक निराशा दिसून येते. पण आज आम्ही तुम्हाला जिल्हा परिषदेच्याच एका अशा शाळेची गोष्ट सांगणार आहोत, ज्या शाळेची आज सर्वत्र चर्चा होत आहे.

हिरवळीने नटलेला परिसर, कोरीव दर्जेदार बांधकाम आकर्षक, रंगसंगतीत बोलक्या झालेल्या भिंती. त्यावर रेखाटलेलं बहुविधज्ञान, बागेतल्या ताज्या भाजीपाल्याचा पोषण आहारात वापर, एखाद्या स्टार हॉटेलात असतं तसं हँडवॉश स्टेशन, वर्गाच्या चार भिंतीच्या आत डिजिटल शिक्षण, अशी व्यवस्था या मराठी शाळेत आहे. आता तुम्हाला प्रश्न नक्कीच पडला असेल की ही शाळा नेमकी आहे तरी कुठे. तर ही शाळा म्हणजे धाराशिव जिल्ह्यातील भाटशिरपूरा येथील जिल्हा परिषद शाळा.

मुख्यमंत्री माझी शाळा, सुंदर शाळा या अभियानात लातूर शिक्षण विभागात ही शाळा प्रथम आली आहे. तसेच या शाळेचा 21 लाख रुपये व पारितोषिक देऊन गौरव करण्यात आला आहे. शाळेच्या परिसरात 650 वृक्षांची लागवड करण्यात आली आहे. विविध उपक्रम राबवले जात आहेत.