Maratha Reservation : मराठा तरुणानं लोकसभेच्या उमेदवारीसाठी सोयाबीन ठेवलं तारण, स्वत:सह आई-वडील अन् पत्नीचा भरणार अर्ज

धाराशिव, बालाजी निरफळ, प्रतिनिधी : एकीकडे लोकसभा निवडणुकीचं बिगूल वाजलं आहे, तर दुसरीकडे राज्यात मराठा आरक्षणाचा मुद्दा देखील चांगलाच तापला आहे. मराठा समाजाला दहा टक्के स्वतंत्र आरक्षण देण्यात आलं आहे, मात्र आम्हाला ओबीसीमधूनच आरक्षण हवं या भूमिकेवर मराठा आंदोलक मनोज जरांगे पाटील ठाम आहेत. तसेच सरकारने सगे -सोयरे अध्यादेशाची अंमलबजावणी करावी अशी मागणी देखील त्यांची आहे. दरम्यान याच सर्व पार्श्वभूमीवर प्रत्येक गावातून मराठा समाजानं लोकसभा निवडणुकीसाठी उमेदवारी अर्ज दाखल करावेत असं आवाहन जरांगे पाटील यांनी केलं आहे. त्यांच्या आवाहानाला मोठा प्रतिसाद मिळत असल्याचं दिसून येत आहे. धाराशिव जिल्ह्यातल्या कारी गावातील तरुणानं आपलं सोयाबीन तारण ठेवून उमेदवारी अर्ज भरण्याची तयारी केली आहे.