केसरकरांकडून अशोक खरातची भलामण, शिवसेना आमदारांची तक्रार, एकनाथ शिंदे चांगलेच संतापले

उदय जाधव, प्रतिनिधी, मुंबई : नाशिकचा भोंदू अशोक खरात प्रकरणात महिला आयोगाच्या अध्यक्षा रुपाली चाकणकर यांना राजीनामा द्यावा लागला आहे. चाकणकर याच्यानंतर भोंदू खरातबरोबर दीपक केसरकर यांची चांगलीच उठबस असल्याचे आरोप होत आहे. केसरकर अनेकदा खरात याने उभारलेल्या मंदिरात पूजेसाठी जायचे. किंबहुना मुख्यमंत्री असताना एकनाथ शिंदे यांनाही त्यांनीच खरात याच्याकडे नेले, असेही आरोप होत आहेत. या सगळ्याच्या पार्श्वभूमीवर बोलताना आपल्याला टार्गेट केले जात असल्याचे केसरकर म्हणाले. शिवाय मुख्यमंत्री एकनाथ शिंदे यांच्यासोबत आपण गेलो होतो, असे म्हणत त्यांनी शिंदेंवर हे प्रकरण ढकलण्याचा प्रयत्न केला. यामुळेच एकनाथ शिंदे हे केसरकर यांच्यावर चांगलेच संतापले असल्याचे विश्वसनीय सूत्रांनी सांगितले.