बायको, मुलगा प्रचारात चप्पल न घालता अनवाणी पायांनी फिरले! शिंदेंचा शिलेदार तुरुंगातून लढला अन् जिंकला

निकाल जाहीर होताच कोल्हे कुटुंबीयांच्या समर्थकांमध्ये जल्लोषाचे वातावरण निर्माण झाले. मात्र, विजयाचा आनंद साजरा करताना भावनिक सूर अधिक ठळकपणे दिसून आला. ललित कोल्हे यांच्या पत्नी सरिता कोल्हे यांनी माध्यमांशी संवाद साधताना सांगितले की, “ललित सध्या तुरुंगात आहेत आणि त्यांच्यावर अतिशय घृणास्पद आरोप लावण्यात आले आहेत. तरीही मतदारांनी आमच्यावर दाखवलेला विश्वास हा आमच्यासाठी मोठा आधार आहे. मताच्या माध्यमातून जनतेने अन्यायाविरुद्ध आवाज उठवला आहे. हा विजय म्हणजे मतदारांनी दिलेला प्रेमाचा आणि विश्वासाचा कौल आहे.”

दरम्यान, ललित कोल्हे हे बोगस कॉल सेंटर चालविल्याच्या आरोपाखाली अटकेत आहेत. अटक झाल्यानंतर नऊ दिवस ते पोलीस कोठडीत होते. त्यानंतर न्यायालयाने त्यांना न्यायालयीन कोठडी सुनावली आहे. जळगाव कारागृहात पुरेशी जागा नसल्याने प्रशासनाने त्यांची थेट नाशिक कारागृहात रवानगी केली आहे. या संपूर्ण घडामोडींच्या पार्श्वभूमीवरही मतदारांनी कोल्हे यांना निवडून दिल्याने या निकालाला विशेष महत्त्व प्राप्त झाले आहे.