Guillain Barre syndrome : लातूरमध्ये खरंच GBS शिरकाव झालाय काय? 'त्या' दोन संशयीत रूग्णांचा अहवाल काय?

पुणे पाठोपाठ लातूरमध्येही जीबीएसचे ( GBS)चे दोन संशयीत रूग्ण सापडले होते. त्यानंतर या रुग्णांना लातूरच्या विलासराव देशमुख शासकीय वैद्यकीय महाविद्यालयात उपचाराखातर दाखल करण्यात आले आहे. तपासणीनंतर एका रुग्णाचा अहवाल हा निगेटिव्ह आलं आहे. तर दुसऱ्या रुग्णाचा अहवाल येणं बाकी आहे. त्यामुळे अद्याप तरी एकाही रूग्णाला जीबीएसची लागण झाल्याचे अहवालावरून तरी स्पष्ट होत आहे. मात्र तरी खबरदारी म्हणून लातूरमधील नागरीकांना मोठं आवाहन करण्यात आलं आहे.

जुलाब होणे, ताप येणे ही या आजाराची प्राथमिक लक्षणे आहेत. स्वच्छ राहणे, पाणी उकळून पिणे महत्वाचे असू न नागरिकांनी खबरदारी घेण्याचे आवाहन लातूरच्या विलासराव देशमुख शासकीय वैद्यकीय महाविद्यालयाचे अधिष्ठाता डॉ.उदय मोहिते पाटील यांनी केलं आहे.

पुण्यात सध्या 111 रुग्ण आहेत, 80 रुग्ण पाच किमीच्या परिघातील आहेत. 35,000 घरे आणि 94,000 नागरिकाच्या चाचण्या घेण्यात आल्या आहेत. चाचणी घेण्यासाठी नॅशनल इन्स्टिट्यूट ऑफ व्हायरॉलॉजी यांची मदत घेतली जाते आहे. एक मृत्यू झाला तो अद्याप GBS मुळेच झाला याची अजून पुष्टी नाही, असं सार्वजनिक आरोग्य विभागाच्या वतीने सांगण्यात आलं.

गुईलेन बॅरे सिंड्रोमच्या (जीबीएस) रुग्णांवर उपचार करण्यासाठी शासकीय रुग्णालयात विशेष व्यवस्था निर्माण करावी, अशा सूचना मुख्यमंत्री देवेंद्र फडणवीस यांनी दिल्या आहेत. पुणे शहरांतील रुग्णांवर उपचारासाठी पुणे महापालिकेच्या कमला नेहरू रुग्णालयात तर पिंपरी चिंचवड महानगरपालिकेच्या यशवंतराव चव्हाण मेमोरियल रुग्णालयात उपचार करण्याची सूचना करण्यात आली आहे, असं उपमुख्यमंत्री अजित पवार यांनी सांगितलंय.