Jalgoan Crime : जळगावात 'मुळशी पॅटर्न'! किरकोळ वादातून गोळीबाराची घटना, आकाश उर्फ टपऱ्या बाविस्करचा मृत्यू

या घटनेत आकाश उर्फ टपऱ्या युवराज बाविस्कर या तरुणाचा गोळी लागून मृत्यू झाला असून, अन्य तीन जण जखमी झाले आहेत. दोन तरुणांमध्ये किरकोळ कारणावरून सुरू झालेला वाद इतका चिघळला की त्याचे रूपांतर गोळीबारात झालं आणि यात एका तरुणाला आपला जीव गमवावा लागला.

या गोळीबारात जखमी झालेल्या तिघांवर सध्या जिल्हा शासकीय रुग्णालयात उपचार सुरू आहेत. घटनेची माहिती मिळताच पोलिसांनी तात्काळ तपासचक्रे फिरवत आकाश उर्फ डोया नावाच्या संशयित आरोपीला ताब्यात घेतले आहे. या घटनेनंतर संपूर्ण परिसरात भीतीचे वातावरण निर्माण झाले आहे. कोणतीही अनुचित घटना घडू नये यासाठी पोलिसांनी परिसरात कडक बंदोबस्त तैनात केला असून, सध्या येथे तणावपूर्ण शांतता आहे. पोलीस या प्रकरणाचा कसून तपास करत आहेत.

दरम्यान, जळगावातून आणखी एक धक्कादायक घटना समोर आली होती. जळगावच्या धरणगाव (Dharangaon) शहरातील सत्यनारायण चौकात पेट्रोल चोरीच्या संशयावरून हटकल्याने मोठा वाद उफाळून आला होता. अशातच या वादातून एका तरुणावर चाकूने प्राणघातक हल्ला केल्याची घटना घडलीय. या घटनेनंतर परिसरात मोठी खळबळ उडाली असून परिसरात भीतीचं वातावरण होतें. भूषण सुरेश भागवत या तरुणावर साई कासार, तुषार उर्फ मुन्ना नेरपगार आणि क्रिश राठोड या तिघांनी हल्ला केल्याची माहिती समोर आली होती.