जालना शहरात आढळला बिबट्या?, CCTV मध्ये काय दिसलं, वनविभागाने केले हे महत्त्वाचं आवाहन

जालना : वाढलेल्या सिमेंट जंगलांमुळे हिंस्रप्रशु नागरी वस्तीमध्ये घुसल्याचे प्रकार हल्ली मोठ्या प्रमाणावर वाढले आहेत. छत्रपती संभाजी नगरमध्ये तर बिबट्याने मॉलमध्ये सैर केल्याचेही समोर आले होते. पण आता संभाजीनगरला लागूनच असलेल्या जालना शहरामध्येही 6 ऑगस्ट रोजी बिबट्या पाहायला मिळाला आहे. शहरातील शितल विहार कॉलनीमध्ये रात्री 2 वाजून 10 मिनिटांनी कॉलनीतील सीसीटीव्ही कॅमेऱ्यात बिबट्या आढळून आला. त्याचबरोबर याच भागामध्ये एक बकरी शीर आणि धड वेगळं असलेल्या अवस्थेत आढळल्याने एकच खळबळ उडाली आहे.

30 जुलै रोजी जालना शहराला लागून असलेल्या वन विभाग परीक्षेत्रात विभक्त झालेले मृत हरण आढळले होते. या हरणाच्या शवविच्छेदनामध्ये रिपोर्टमध्ये हिंस्र प्राण्यांनी शिकार केल्याचे निष्पन्न झाले होते. त्यामुळे जालना शहराच्या आसपास बिबट्या किंवा तत्सम हिंस्र प्राणी असल्याच्या वार्तांना वनविभागाने दुजोरा दिला आहे. त्याचबरोबर सीसीटीव्हीमध्ये दिसत असलेला प्राणी हा बिबट्याच असल्याची खात्री वन विभागाने केली.