Jalna Rain : जालन्यात मुसळधार पाऊस; परतूर, मंठा तालुक्यात जनजीवन विस्कळीत, VIDEO

जालना : मागील 36 तासांपासून संपूर्ण मराठवाड्यात मुसळधार पावसाने हजेरी लावली आहे. यामुळे नद्या, नाल्यांना पूर आला आहे. मराठवाड्यातील अनेक प्रकल्पांमध्ये पाण्याची आवक होण्यास सुरुवात झाली आहे. सोमवारी 11:30 वाजता निम्न दुधना प्रकल्पाचे चार दरवाजे 0.50 मीटरने उघडण्यात येणार असून यातून 6528 क्युसेकने दुधना पात्रात पाणी सोडण्यात येणार आहे. यामुळे दुधना पात्र परिसरातील गावातील नागरिकांनी सतर्कता बाळगावी, असे आवाहन निम्न दुधना प्रकल्प, पुर नियंत्रण कक्षाकडून करण्यात आले आहे.

जालना जिल्ह्यात परतुर आणि मंठा तालुक्यामध्ये पावसाचा जोर हा अधिक असून अनेक ठिकाणी ढगफुटी सदृश्य पाऊस झाला आहे. यामुळे परतुर तालुक्यातील केसुरा नदीला पूर आला आहे. तसेच परतुर ते आष्टी दरम्यानचा संपर्कही तुटल्याचे पाहायला मिळाले आहे. यासोबतच मंठा शहरांमध्ये झालेल्या मुसळधार पावसाने जनजीवनावर मोठ्या प्रमाणावर परिणाम झाला आहे.

रस्त्यावरून 2 ते 3 फुटांपर्यंत पाणी वाहत असल्याने अनेक नागरिकांच्या घरात पाणी शिरल्याचे देखील चित्र पाहायला मिळाले. जालना जिल्ह्यातील सर्वच तालुक्यांमध्ये मागील 36 तासांमध्ये मुसळधार पाऊस झाला आहे. यामुळे अनेक ठिकाणी शेती पाण्याखाली गेली आहे. तसेच सोयाबीन, कापूस, मोसंबी इत्यादी पिकांचे या पावसामुळे मोठे नुकसान झाले आहे.