ते गुंड मलाच विधान भवनात मारायला आले होते... जितेंद्र आव्हाड मोठ्याने ओरडले, धमकीचे मेसेज दाखवले

मुंबई : राष्ट्रवादीचे आमदार जितेंद्र आव्हाड आणि भाजपचे आमदार गोपीचंद पडळकर यांच्यातला शा‍ब्दिक वाद आता गुद्द्यांवर येऊन पोहोचला आहे. दोघा नेत्यांमध्ये काल शिवीगाळीची घटना घडल्यानंतर आज एकमेकांच्या कार्यकर्त्यांमध्ये विधान भवनाच्या लॉबीमध्ये जोरदार राडा झाला. जितेंद्र आव्हाड यांचे समर्थक नितीन देशमुख यांना गोपीचंद पडळकर यांच्या कार्यकर्त्यांनी मारहाण केल्याचा आरोप आहे. अधिवेशन सुरू असताना आणि विधान भवनाला कडेकोट सुरक्षा व्यवस्था असताना विधान भवनाच्या द्वाराजवळच हा सगळा प्रकार घडल्याने आमदार आणि मंत्र्यांच्या सुरक्षिततेचा मुद्दा उपस्थित होत आहे.