अंगारकी संकष्टी विशेष : कोल्हापूरच्या रक्षणासाठी अंबाबाईने नियुक्त केलेल्या श्री सिद्ध बटुकेश्वर देवतेचे मंदिर, असा आहे इतिहास

करवीरच्या पश्चिम द्वाराचे रक्षणासाठी कोल्हासूर राक्षसाने सध्याच्या चंबूखडी टेकडीवर रक्ताक्ष नावाच्या राक्षसाची नियुक्ती केली होती. कोल्हासुराच्या वधानंतर करवीर निवासिनी श्री अंबाबाईने करवीरच्या रक्षणासाठी या पश्चिम द्वारावरील रक्ताक्ष राक्षसाचा वध करण्यासाठी श्री सिद्ध अर्थात गणपती आणि श्री बटुकेश्वर अर्थात भैरव या दोन देवतांना नियुक्त केले होते. प्रथम बटुकेश्वर प्रथम रक्ताक्षावर चालून गेले असता युद्धावेळी रक्ताक्षाने श्री बटुकेश भैरवास मायास्त्राने मोहित केले. हे पाहुन श्री सिद्ध गणेश रक्ताक्षावर चालून गेले आणि त्यांनी रक्ताक्षाचे शिर धडावेगळे केले. पुढे श्री सिद्ध आणि श्री बटुकेश्वर नंतर याच पर्वतावर निवास करून राहिले, अशी महती करवीर महात्म्य ग्रंथातील 48 व्या अध्यायात सांगितल्याचे पुजारी प्रभावळीकर यांनी सांगितले.

पुजारी अतुल अशोक प्रभावळीकर हे गेली 30 वर्षे या मंदिराचे पुजारी म्हणून पूजाअर्चा करत आले आहेत. मंदिरात दररोज सकाळी 7.30 ते 8.30 वाजेपर्यंत पंचोपचार पूजा केली जाते. मंगळवारी, शुक्रवारी भाविक अभिषेक पूजा करण्यासाठी येत असतात. संकष्टीच्या दिवशी पहाटे साडेपाच वाजता अभिषेक केला जातो. तर रात्री चंद्रोदयावेळी आरती केली जाते. अंगारकी संकष्टीच्या निमित्ताने पहाटे आणि चंद्रोदयावेळी देखील अभिषेक पूजा केली जाते. तर गणपतीचे आवडीच्या मोदकांचा नैवेद्य दाखवून रात्री आरती प्रभावाळीकर पुजारी करत असतात.