Angarki Chaturthi 2024 : तब्बल 6 लाख भाविक घेणार राजुरेश्वराचे दर्शन, प्रशासनानं केली महत्त्वाची तयारी, असं असणार नियोजन

जालना : येत्या 25 जून रोजी तब्बल दीड वर्षानंतर अंगारकी चतुर्थी आहे. अंगारकी चतुर्थीला जालन्यातील राजूर येथे गणेश भक्तांची मोठी गर्दी पाहायला मिळते. या अंगारकी चतुर्थीला राजूर येथे दर्शनासाठी तब्बल 6 लाख भाविक येतील, असा अंदाज आहे. भाविकांच्या सोयीसाठी 65 बसची सोय जालना येथून करण्यात आली आहे. तर 50 बस राजूर येथे मुक्कामी थांबणार आहेत. भाविकांची कोणतीही गैरसोय होणार नाही, यासाठी मोठा पोलिस बंदोबस्त तैनात ठेवण्यात आला आहे, अशी माहिती सहायक पोलिस निरीक्षक संजय आहिरे यांनी दिली.

राजुश्वरांचे दर्शन घेण्यासाठी येणाऱ्या भाविकांना तत्काळ वैद्यकीय सेवा मिळावी, या उद्देशाने प्रशासनाकडून तीन विशेष वैद्यकीय पथकांची स्थापना केली आहे. ही पथके राजूर परिसरात वेगवेगळ्या ठिकाणी राहणार आहे. परिसरात अग्निशमन आणि रुणवाहिकाही तैनात आहेत. या ठिकाणी पिण्याच्या पाण्याची सोयही केली आहे.