Kolhapuri Chappal : चक्क खिशात मावणारी कोल्हापुरी चप्पल, आता गाजवतीय मार्केट, काय आहे खास?

कोल्हापुरातील भुदरगड तालुक्यातील मडिलगे बुद्रुक गावात बाणाजी आणि धनाजी चव्हाण यांचा वडिलोपार्जित कोल्हापुरी चप्पल बनवण्याचा व्यवसाय आहे. चव्हाण कुटुंबाची तिसरी पिढी या व्यवसायाला नावारूपाला आणत आहे. गेल्या 40 वर्षांपासून मडिलगेची कोल्हापुरी या ब्रँडने देश-विदेशात आपली छाप पाडली आहे. अमेरिका, युरोपसह मुंबई, दिल्ली, बेंगलोर यासारख्या शहरांतील ग्राहक चव्हाण बंधूंकडून आपल्या आवडीप्रमाणे चपला बनवून घेतात. ज्येष्ठ नेते शरद पवार, उद्योगपती अनिल अंबानी यांच्यासह मराठी चित्रपटसृष्टीतील अनेक सिनेकलाकारांनी चव्हाण बंधूंच्या कोल्हापुरी चपला परिधान केल्या आहेत. या यशस्वी प्रवासात चव्हाण बंधूंनी ग्राहकांच्या मागणीनुसार सातत्याने नवनवीन प्रयोग केले. ग्राहकांकडून वारंवार हलक्या आणि सुबक चपलेची मागणी होत होती. यातूनच त्यांना खिशात मावणारी, प्रवासात हलकी आणि आकर्षक कोल्हापुरी चप्पल बनवण्याची संकल्पना सुचली.

चव्हाण बंधूंची तिसरी पिढी हा व्यवसाय यशस्वीपणे चालवत आहे; पण हस्तकलेत निपुण असलेल्या कारागिरांची कमतरता जाणवत आहे. आधुनिक तंत्रज्ञानाने या क्षेत्रातही शिरकाव केला आहे. त्याचबरोबर नव्या पिढीला ब्रँडेड सँडल आणि शूजची क्रेझ आहे. यामुळे पारंपारिक कोल्हापुरी चपलेकडे नव्या पिढीचं दुर्लक्ष होत आहे. परिणामी, या व्यवसायाला अनेक आव्हानांचा सामना करावा लागत आहे. नव्या पिढीने या व्यवसायात यावं यासाठी शासनाने विशेष योजना आणि प्रोत्साहन देण्याची गरज आहे, अशी मागणी चव्हाण कुटुंबीयांनी केली आहे.