कोल्हापूरकरांची 'लय भारी' आरास, बाप्पांसाठी उभारला जयप्रभा स्टुडिओ

बऱ्याच सिनेकलाकार आणि तंत्रज्ञांसाठी जयप्रभा स्टुडिओ हे एक मंदिरच आहे. सध्या बंद असलेला हा स्टुडिओला कित्येकांनी जवळून पाहिले, अनुभवले आहे. हेच कोल्हापूरचे वैभव पुन्हा परत मिळावे, तिथल्या गाभाऱ्यात लाईट, कॅमेरा, ॲक्शनचा घंटानाद पुन्हा व्हावा, ही प्रत्येकाची इच्छा आहे. त्यासाठीच कोल्हापूरकर आजवर लढा देत आलेले आहेत. तर लोकांना या देखाव्याच्या माध्यमातून पूर्वीचा जयप्रभा स्टुडिओ पाहायला मिळेल आणि त्यामुळे स्टुडीओसाठी एकत्र प्रयत्न करुन हा स्टुडिओ पुन्हा लवकर सुरू करता येईल, अशी एक भावना मनात धरून मी हा स्टुडिओ घरी देखाव्याच्या रुपात जसाच्या तसा साकारला आहे, असे रवी गावडे यांनी सांगितले.

रवी यांचे वडील चित्रकर्मी कै. सिध्दू गावडे यांनी त्यांचे संपूर्ण आयुष्य ह्या स्टुडिओमध्ये घालवले होते. 1970 पासून ते इथेच वाढले आणि मोठे झाले. प्रोडक्शन मॅनेजर म्हणून त्यांनी अनेक सिनेमांचे शूटिंग इथे केले आहे. वडिलांची आठवण म्हणून ह्या स्टुडिओच्या देखाव्यात त्यांनी केलेल्या काही मोजक्या सिनेमांची पोस्टार्स लावल्याचे देखील रवी यांनी सांगितले.

खरंतर रवी यांचेही या स्टुडिओशी एक वेगळे नाते आहे. ते कॉलेज मध्ये असल्यापासून चित्रपट सृष्टीत कार्यरत आहेत. त्यांनी त्यांच्या वडिलांसोबत अनेक सिनेमांमध्ये सहायक म्हणून काम केले होते. तर ज्येष्ठ दिग्दर्शक कै. यशवंत भालकर यांच्यामुळे पहिल्यांदा स्वतंत्र प्रॉडक्शन मॅनेजर म्हणून 'नाथा पुरे आता' या सिनेमासाठी काम करायला मिळाले होते. रवी यांच्या चित्रपट व्यवसायाची खरी सुरुवात चित्रतपस्वी भालजी पेंढारकर यांच्या जयप्रभा स्टडिओ या पावन भूमीतून झाली. त्यामुळे या स्टुडिओशी त्यांच्या कुटुंबाची नाळ जोडली गेली आहे. आजवर तुझ्यात जीव रंगला, जुळता जुळता जुळताय की, प्रेमाचा गेम, जीव माझा गुंतला, सुंदरी अशा मालिका आणि कित्येक सिनेमांसाठी त्यांनी काम केले आहे.

जयप्रभा स्टुडिओ बनवायचा ठरल्यानंतर त्याचा जिवंतपणा आणण्यासाठी अनुकूल अरुण सुतार यांचा मोलाचा वाटा आहे. त्यांनी या ठिकाणच्या प्रत्येक गोष्टीचा बारकाईने विचार करुन त्या साकारल्या आहेत. गणपतीची आरास आणि सजावट म्हणून साकारलेला हा देखावा खरंतर लोकांनी पाहण्यासारखा आहे. त्यामुळे सध्या गणेशोत्सव काळात रवी यांच्या घरी असणारा हा देखावा नंतर देखील कोल्हापूरकरांना पाहायला मिळणार आहे. कोल्हापुरात चित्रपट महामंडळाचे नवीन ऑफिस बनत आहे. काम पूर्ण झाल्यानंतर हा सर्व देखावा त्या ठिकाणी ठेवण्यात येणार आहे.