शासनाला 44 लाखांचा चुना! कोल्हापूरात बोगस कामगार नोंदणीचा 'महा'घोटाळा; 25 जणांवर गुन्हे दाखल

मिळालेल्या माहितीनुसार, बांधकाम कामगार कल्याण योजनांतर्गत अनेक लाभांची सुविधा दिली जाते. या लाभांसाठी बनावट कागदपत्रे सादर करून कोट्यवधी रुपयांची फसवणूक झाल्याची शक्यता या घटनेतून समोर आली आहे. यापूर्वी राज्यात अशा प्रकारची ही पहिलीच मोठी कारवाई असल्याने बांधकाम कामगार आणि एजंट यांच्यात एकच खळबळ उडाली आहे. या प्रकरणामुळे योजनेंतर्गत वाढलेली गैरशिस्त आणि लाचखोरीचे प्रकारही समोर आले आहेत.

सहायक कामगार आयुक्त रोहित विश्वनाथ गोरे यांनी दिलेल्या फिर्यादीनुसार, बांधकाम कामगार कल्याण योजनेतर्गत लाभ घेण्यासाठी काही व्यक्तींनी बनावट दिव्यांग प्रमाणपत्रे सादर केली, तर काहींनी चक्क मृत व्यक्तींच्या नोंदी चुकीच्या पद्धतीने दाखवून योजनांचा लाभ मिळवला. या सर्व अनियमितता आणि फसवणुकीमुळे शासनाचे मोठे आर्थिक नुकसान झाले आहे.