पुणे-मुंबईनंतर आणखी एक महामार्ग ठप्प! कोल्हापूरकडे जाणाऱ्या वाहतुकीचा खोळंबा, काय घडलं?

पुण्याहून कांद्याने भरलेला ट्रक हातकणंगले तालुक्यातील घुणकी येथील ओढ्याच्या पुलाजवळच पलटी झाला. आज सकाळी घडलेल्या या घटनेमुळे ट्रकमधील कांदा सगळ्या रस्त्यावर विखुरला गेला. त्यामुळे पुण्याकडून येणारी वाहतूक पूर्णपणे ठप्प झाली. त्यामुळे किनी टोलनाका ते कराडमार्गावर वाहतूक खोळंबल्याचे चित्र आहे. घटनास्थळी पोलीस दाखल झाले असून वाहतूक सुरळीत करण्याचे प्रयत्न सुरू आहेत.

दरम्यान, अपघातात कोणतीही जीवितहानी झाल्याची माहिती नाही. कागल ते सातारा दरम्यान राष्ट्रीय महामार्गाचे सहा पदरीकरणाचे काम सध्या सुरू आहे. घुणकी नजीकच्या ओढ्यावरील पूर्वेकडील पुलाचे काम सुरू आहे. त्यामुळे सध्या पश्चिमेकडील पुलावरूनच दुहेरी वाहतूक सुरू आहे. याठिकाणी पुण्याकडून येणाऱ्या वाहनांना अचानक पश्चिमेकडील पुलावर वळावे लागते. त्यामुळे वाहनावरील ताबा सुटतो आणि वाहन पलटी होण्याचे आणि अपघाताचे प्रकार घडत आहेत. यापूर्वी झालेल्या अपघातात काहींना जीवही गमवावा लागला होता.