SSC Result: ट्युशन नव्हे, शिक्षकांवरच ठेवला विश्वास, कोल्हापूरचा अजीम 100 टक्क्यांनी पास!

अजीमच्या यशामागे त्याची शिस्तबद्ध जीवनशैली आणि अभ्यासाची सातत्यपूर्ण पद्धत आहे. तो रोज सकाळी लवकर उठून अभ्यासाला सुरुवात करायचा. शाळेत शिकवलेल्या प्रत्येक संकल्पनेची नीट उजळणी करणे, प्रश्नपत्रिका सोडवणे आणि शिक्षकांशी सतत संपर्कात राहणे, यामुळे त्याला अभ्यासाची स्पष्ट दिशा मिळाली. त्याने प्रत्येक विषयासाठी स्वतःचे वेळापत्रक तयार केले होते. “मी प्रत्येक विषयाला समान वेळ देत असे. जे कठीण वाटायचे, त्यावर जास्त मेहनत घ्यायचो. शिक्षकांनी दिलेल्या टिप्स आणि गतवर्षीच्या प्रश्नपत्रिकांचा आधार घेऊन मी तयारी केली,” असे अजीमने सांगितले.

अजीमच्या यशात त्याच्या पालकांचा आणि शिक्षकांचा मोलाचा वाटा आहे. त्याच्या पालकांनी कधीही त्याच्यावर खासगी क्लासेस लावण्यासाठी दबाव टाकला नाही. उलट, त्यांनी त्याला स्वतःच्या पद्धतीने अभ्यास करण्याची पूर्ण मुभा दिली. “अजीमने आम्हाला नेहमीच अभिमान वाटेल अशी कामगिरी केली आहे. त्याने स्वतःच्या मेहनतीवर विश्वास ठेवला आणि आम्ही त्याला पाठिंबा दिला,” असे त्याचे वडील सय्यद नदाफ यांनी सांगितले. अजीमच्या आईनेही त्याला नेहमी प्रोत्साहन दिले. “अजीम खूप मेहनती आहे. तो कधीही हार मानत नाही. आम्ही फक्त त्याला योग्य वातावरण आणि प्रेम दिले,” असे त्या म्हणाल्या.

अजीमचे हे यश अनेक विद्यार्थ्यांसाठी प्रेरणादायी आहे. विशेषतः जे विद्यार्थी आर्थिक परिस्थितीमुळे किंवा अन्य कारणांमुळे खासगी क्लासेस घेऊ शकत नाहीत, त्यांच्यासाठी अजीमचा प्रवास एक आदर्श आहे. खासगी क्लासेसशिवायही मेहनत, शिस्त आणि योग्य मार्गदर्शनाने यश मिळवता येते, हे अजीमने दाखवून दिले आहे. “प्रत्येक विद्यार्थ्याने स्वतःवर विश्वास ठेवावा. मेहनत आणि योग्य मार्गदर्शन असेल तर कोणतेही ध्येय अशक्य नाही,” असा संदेश अजीमने दिला.

दहावीच्या यशानंतर अजीमने डॉक्टर होण्याचे स्वप्न उराशी बाळगले आहे. तो आता पुढील शिक्षणासाठी विज्ञान शाखेत प्रवेश घेणार आहे. त्याचे स्वप्न आहे की, भविष्यात तो एक यशस्वी डॉक्टर व्हावा आणि समाजाची सेवा करावा. “मला माझ्या गावातील लोकांसाठी काहीतरी चांगले करायचे आहे. डॉक्टर होऊन मी त्यांना चांगली वैद्यकीय सेवा देईन,” असे अजीम आत्मविश्वासाने सांगतो. त्याच्या या दृढनिश्चयाला त्याचे पालक आणि शिक्षक यांचा पूर्ण पाठिंबा आहे.