Swapnil Kusale : फायनलसाठी गावातली मंडळी स्वप्नीलच्या घरी, निकाल लागताच एकच जल्लोष, VIDEO

क्रीडा विषयक प्रशिक्षण घेत असताना पुण्यातील बालेवाडी क्रीडा संकुलातून सांगली येथे प्रशिक्षण केंद्र मिळाल्याने सांगलीमध्येच स्वप्नीलने शिक्षण घेत आपले भविष्य घडवायला सुरुवात केली होती. फक्त 15-16 वर्षांचा असताना नववीत शिक्षण घेणाऱ्या स्वप्नीलने नाशिक येथे जाऊन नेमबाजीचे प्रशिक्षण घेतले होते. शिकत असताना स्वप्निलचे मन मात्र ऑलिम्पिककडेच असायचे. यातच 2008 साली अभिनव बिंद्राचा ऑलिम्पिकचा खेळ पाहण्यासाठी बारावीच्या परीक्षेलाही दुर्लक्षित केले होते. तर योग्य प्रशिक्षण आणि सरावाच्या बळावर अनेक शालेय स्तरावरील स्पर्धांपासून ते राज्यस्तरीय स्पर्धांमध्ये स्वप्निलने अनेक पदके मिळवली होती. हाच त्याचा प्रवास पुढे सुरू ठेवण्यासाठी 2009 साली स्वप्निलचा प्रवेश महाराष्ट्र सरकारच्या क्रीडा प्रबोधिनीत झाला. पुढे 2015 मध्ये राष्ट्रीय स्तरावरील एका स्पर्धेत रौप्य पदक मिळवून राष्ट्रीय पातळीवर स्वप्निल चर्चेत येऊ लागला. कुवेतमधील एशियन गेम्स स्पर्धेत सुवर्णपदकाचा देखील तो मानकरी ठरला. त्यामुळे त्याला भारतीय रेल्वेमध्ये तिकीट तपासणीस म्हणून नोकरी मिळाली.

टीसी म्हणून कार्यरत असतानाच 2018 साली राष्ट्रकुल स्पर्धेत स्वप्निलने कांस्यपदक मिळवले. पुढे 2020 टोकियो ऑलम्पिक स्पर्धांच्या पात्रता फेरीत अवघ्या 0.03 गुणाने त्याची संधी हुकली होती. मात्र, खचून न जाता स्वप्नीलने पुन्हा नव्या जोशात तयारी करून आता 2024 च्या पॅरिस ऑलम्पिकमध्ये आपल्या नावाचा डंका वाजवला आहे. यासाठी गेल्या 10 वर्षांपासून स्वप्निलकडून प्रशिक्षक म्हणून योग्य आणि कसून सराव करून घेतल्याचा फायदा होत आहे, असे प्रशिक्षिका दिपाली देशपांडे सांगतात. तर सध्या सुरू असलेल्या पॅरिस ऑलिम्पिक स्पर्धेत स्वप्नीलने सुरुवातीपासूनच चांगले प्रदर्शन करत गुणांमध्येही गुणांमध्येही सातत्य ठेवले होते. 50 मीटर एअर रायफल गेममध्ये अंतिम सामन्यात धडक मारताना स्वप्निलने पात्रता स्पर्धेत थ्री पोझिशन इव्हेंटमध्ये सातव्या स्थानावर राहून 590 गुणांची कमाई केली होती.