कोल्हापूर सर्किट बेंचसाठी 'मिशन मोड'वर काम! 60 हजार खटले वर्ग होणार, 700 वकिलांना मिळणार संधी!

या सर्व खटल्यांची स्थिती पाहण्यासाठी सर्किट बेंचची स्वतंत्र वेबसाईट तयार करण्याचे काम सुरू आहे. त्यामुळे पक्षकारांना आपल्या खटल्याची माहिती ऑनलाइन पाहता येईल. सध्या मुंबई उच्च न्यायालयात कोल्हापूरसह सहा जिल्ह्यांमधील सुमारे 150 ते 200 वकील काम करत आहेत. सर्किट बेंच सुरू झाल्यावर त्यांच्यासह सुमारे 700 वकील येथे कामकाज पाहतील. यामुळे सहा जिल्ह्यांतील वकिलांना मोठी संधी मिळेल, असा विश्वास जिल्हा बार असोसिएशनने व्यक्त केला आहे.

कोल्हापूर सर्किट बेंचसाठी एक डिव्हिजन बेंच (ज्यात दोन न्यायमूर्ती असतील) आणि दोन सिंगल बेंच (प्रत्येकी एक न्यायमूर्ती) मंजूर झाले आहेत. असे एकूण चार न्यायमूर्ती सर्किट बेंचचे कामकाज पाहतील. सर्किट बेंचमध्ये दिवाणी आणि फौजदारी खटले, अपील, जनहित याचिका, जामीन अर्ज, तक्रार अर्ज, हरकत आणि रिट पिटिशन यांसारख्या प्रकरणांचे काम चालणार आहे.