मित्र पत्नीला करायचा मेसेज, पतीनं दोघांच्या मदतीने रचला भयंकर कट, पुढे जे घडलं त्यानं सोलापूर हादरलं!

मिळालेल्या माहितीनुसार, कुसळंब येथील बाळासाहेब उकिरडे यांनी आरोपीच्या पत्नीला मेसेज केला होता. याच रागातून पती योगेश मोरे याने आपल्या दोन साथीदारांसह उकिरडे यांना गाठले. आरोपींनी प्रथम लोखंडी रॉडने उकिरडे यांना बेदम मारहाण केली आणि त्यानंतर त्यांच्यावर पिस्तूलमधून गोळीबार केला. भरदिवसा झालेल्या या गोळीबारामुळे परिसरात मोठी दहशत निर्माण झाली होती.

घटनेनंतर आरोपी आपली कार घेऊन कर्जतच्या दिशेने फरार झाले होते. घटनेचे गांभीर्य ओळखून बार्शी तालुका ग्रामीण पोलिसांनी तातडीने पथके तैनात केली. आरोपी कर्जतच्या दिशेने जात असल्याची खात्रीशीर माहिती मिळताच पोलिसांनी त्यांचा पाठलाग सुरू केला. ८ ते १० किलोमीटर पाठलाग करून अटक करण्यात आली. पोलिसांनी अवघ्या ५ तासांत तिन्ही संशयितांना ताब्यात घेतलं.

योगेश मोरे (मुख्य आरोपी), राहुल गायकवाड आणि रोशन पिसाळ असं अटक केलेल्या आरोपींची नावं आहेत. पोलिसांनी आरोपींच्या ताब्यातून गुन्ह्यात वापरलेले साहित्य आणि शस्त्रे जप्त केली आहेत. यामध्ये एका पिस्तूलासह जिवंत काडतूसं, दोन लोखंडी गज, एक कोयता आणि गुन्ह्यात वापरलेली कार जप्त केली आहे. तिन्ही आरोपींना बार्शी न्यायालयात हजर केले असता, न्यायालयाने त्यांना तीन दिवसांची पोलीस कोठडी सुनावली आहे. या प्रकरणाचा अधिक तपास बार्शी तालुका पोलीस करत आहेत.