Satara Loksabha : 'तुतारीच्या उमेदवाराचा मुतारीत घोटाळा'; वाशी एपीएमसीतल्या आरोपांचे साताऱ्यात पडसाद

सातारा : साताऱ्यातील राष्ट्रवादी शरदचंद्र पवार पक्षाची उमेदवारी मिळालेले माथाडी नेते शशिकांत शिंदे आणि दुसरे माथाडी नेते नरेंद्र पाटील यांच्यात आरोप-प्रत्यारोपांचं सत्र सुरू झालंय, त्यामुळे सातारा लोकसभा निवडणुकीमुळे वाशीतील माथाडींमध्ये फूट पडण्याची शक्यता आहे. सातारा लोकसभा मतदारसंघातून सोमवारी महाविकास आघाडीचे उमेदवार म्हणून माथाडी नेते शशिकांत शिंदेंनी उमेदवारी दाखल केली. शरद पवार यांच्या उपस्थितीत उमेदवारी अर्ज दाखल होतानाच, इकडे माथाडी नेते नरेंद्र पाटील यांनी एपीएमसी मार्केटमधील घोटाळ्याबाबत गंभीर आरोप केले. शिवसेना शिंदे गटाचे आमदार महेश शिंदे यांनी केलेल्या आरोपांमध्ये तथ्य असल्याचं सांगत, नरेंद्र पाटील यांनी शशिकांत शिंदेंना घेरण्याचा प्रयत्न केला.