शेअर मार्केटमध्ये झाला मोठा लॉस, ज्योतीने बहिणीच्या सासऱ्याच्या घरी टाकला दरोडा, तब्बल दीड कोटींचे दागिने केले गायब

भानुशाली यांनी तातडीने पोलिसांकडे धाव घेऊन तक्रार दाखल केली. पोलिसांनी घटनेचा तपास सुरू केला आणि  घराच्या आजूबाजूचे सीसीटीव्ही चेक केले असता त्या सीसीटीव्ही मध्ये बॅगा हातात, घेऊन जाताना कॅप घातलेला पुरुषाचा वेष धारण केलेला इसम दिसला. त्यानंतर पुढे त्या ठिकाणी एका झुडपामध्ये बॅगा लपून त्या ठिकाणी पुन्हा एका महिलेनं येऊन त्या बॅगा घेऊन गेल्याचं पोलीस तपासात निष्पन्न झालं. त्या सीसीटीव्हीचा माग घेता घेता पोलीस गुजरातच्या नवसारी इथं पोहोचले. तिथे गेल्यावर ज्योती मोहन भानुशाली (वय २७) हिला ताब्यात घेतलं. तिच्याकडे दीड कोटी रुपयांचे दागिने पोलिसांनी जप्त केले आहेत. पुरुषाचा वेष धारण करण्यासाठी तिने इंस्टाग्रामवरील मिम्स पाहून केल्याचं पोलिसांनी सांगितलं आहे.

ज्योतीने आपल्यात नातेवाईकाच्या घरात अत्यंत शिताफीने चोरी केली. मध्यवर्ती गुन्हे प्रकटीकरण कक्षाचे पोलीस अधिकारी आणि अंमलदार यांनी घटनास्थळ आणि पुढे अदांजे ७५/८० सीसीटीव्ही फुटेजची पडताळणी केली. त्यामध्ये गुन्हा करणाऱ्या इसमाने चोरी केलेला माल एका ठिकाणी ठेवला. काही वेळाने एक महिला अर्थात ज्योती तिथे आली आणि चोरीचा माल घेऊन गेली. त्यानंतर पुरुष चोर कुठेही दिसून आला नाही. यामुळे सदर चोरीमध्ये महिलेचाही समावेश असल्याचं दिसून आले. सीसीटीव्ही मध्ये दिसून येत असलेली माहिती आणि तांत्रिक विश्लेषण अंती केलेल्या तपासामध्ये फिर्यादी यांच्या गुजरात येथील नातेवाईकाचा सहभाग असल्याचे निष्पन्न झाले.

त्याप्रमाणे मध्यवर्ती गुन्हे प्रकटीकरण कक्षाचे एक पथक नवसारी, गुजरात येथे रवाना करण्यात आलं. गणदेवी पोलीस ठाणे (नवसारी, गुजरात) पोलीसांच्या मदतीने महीला नामे ज्योती मोहन भानुशाली, वय २७ हिला ताब्यात घेउन चौकशी करता स्वतःच्या सख्या बहीणीचे सासरे एकटे असल्याचे माहित असल्याने तिने ओळखू येऊ नये म्हणून पुरुषाचे रुप धारण करुन रूम पाहिजे असं सांगून घरात घुसली आणि चोरी केली. बहिणीच्या सासऱ्याला घरात बाथरूममध्ये कोंडुन ठेवून फिर्यादीच्या बेडरूममधील कपाट चावीच्या मदतीने उघडून कपाटातील सोन्याचे दागिने, चांदीचे दागिने इ, चोरी करून गुन्हा केल्याचं सांगितलं. चोरी केलेले १४९०.८६ ग्रॅम वजनाचे सोन्याचे दागिने, २३२० ग्रॅम वजनाचे चांदिचे दागिने असा रुपये १,५०,८४,०५० किंमतीचा मुद्देमाल हस्तगत करण्यात आला आहे. शेअर बाजारामध्ये पैसे गमावल्यामुळे ज्योतीने चोरी केल्याचं कबुल केलं.