इराण युद्धाचा चटका आता पोटाला! गॅस तुटवड्यानंतर कोळसाही महाग, किलोमागे इतक्या रुपयांची वाढ

हे सगळं असताना आता कोळसा देखील महाग झाला आहे. बाजारपेठेत कोळशाच्या दरात तब्बल १२०० रुपयांची मोठी वाढ झाली असून, किरकोळ विक्रीमध्ये किलोमागे १२ ते १५ रुपयांची वाढ झाल्याची माहिती मिळाली आहे. आखाती देशांतील तणावामुळे एलपीजी पुरवठा साखळी विस्कळीत झाली आहे. हॉटेल व्यावसायिकांनी आपले गॅस शेगड्यांचे बर्नर बंद करून पुन्हा जुन्या 'कोळशाच्या भट्ट्या' पेटवण्यास सुरुवात केली.

इतकंच नाही, तर मध्यमवर्गीय कुटुंबांनीही गॅस वाचवण्यासाठी कोळशाच्या छोट्या चुलींचा वापर सुरू केला आहे. मागणीत अचानक झालेल्या या प्रचंड वाढीमुळे बाजारपेठेत कोळशाचा तुटवडा निर्माण झाला आहे.सध्या परिस्थिती अशी आहे की, खिशात पैसे असूनही कोळसा सहजासहजी मिळत नाहीये. कोळसा विक्रेत्यांच्या मते, "आज ऑर्डर दिली तर कोळसा मिळण्यासाठी किमान आठ दिवसांचा काळ लागत आहे." माल वेळेवर उपलब्ध होत नसल्याने छोटे विक्रेते हतबल झाले आहेत. ज्यांनी आगाऊ साठा करून ठेवला होता, ते आता वाढीव दराने विक्री करत असल्याचे चित्र दिसत आहे.

घरगुती ग्राहकांसोबतच हॉटेल उद्योगाला याचा मोठा फटका बसला आहे. कोळसा महागल्याने तंदूर आणि भट्टीवर चालणाऱ्या पदार्थांच्या किमती वाढण्याची शक्यता आहे. "गॅस परवडत नाही म्हणून कोळशाकडे आलो, तर आता तिथेही भाव गगनाला भिडलेत. व्यवसाय करायचा कसा?" असा उद्विग्न सवाल एका हॉटेल मालकाने विचारला आहे.