Eknath Shinde : ठाकरे गट-भाजपच्या आमदारांनी विधीमंडळात घेरलं, उपमुख्यमंत्री एकनाथ शिंदे अडचणीत?

विधानसभा अध्यक्ष राहुल नार्वेकर यांच्या दालनात होणाऱ्या बैठकीला उपमुख्यमंत्री एकनाथ शिंदे हे देखील उपस्थित राहणार आहेत. त्याशिवाय, मुंबईतील सर्व आमदारांनाही बैठकीला बोलवण्यात आले आहे. आजच्या बैठकीत रस्ते कामात झालेल्या आर्थिक गैरव्यवहारांच्या आरोपांसदर्भात आर्थिक गुन्हे शाखेकडून चौकशी संदर्भात निर्णय होण्याची शक्यता आहे.

एकनाथ शिंदेंची कोंडी करण्याचा मुंबईतील विरोधी आणि भाजपच्या सत्ताधारी आमदारांचा प्रयत्न असल्याची चर्चा सुरू आहे. एकनाथ शिंदे मुख्यमंत्री असताना त्यांनी सुरू केलेल्या मुंबईतील रस्ते काँक्रिटीकरणाच्या कामांवर विरोधकांसोबत सत्ताधारी आमदारांकडून रस्त्याचा दर्जा आणि आर्थिक व्यवहाराचे आरोप सभागृहात केले आहेत. त्यावर रस्त्यांच्या कामासंदर्भात आमदारांची समिती नेमून आर्थिक गुन्हे शाखेकडून चौकशी बाबत बैठक घेऊन निर्णय करू असं विधानसभा अध्यक्षांनी याआधीच स्पष्ट केले आहे. त्यामुळे आजच्या बैठकीत त्यासंदर्भात निर्णय होण्याची शक्यता आहे.

शिवसेना ठाकरे गटाचे आमदार, नेते आदित्य ठाकरे यांनी सातत्याने रस्त्याच्या कामात घोटाळा होत असल्याचा आरोप केला आहे. मुंबईतील रस्त्याच्या कामे पूर्णत्वास जाणार नसल्याची भीती त्यांनी व्यक्त केली होती. काही खास कंत्राटदारांवर मेहेरनजर असून त्यांच्यावर कामातील दिरंगाईवर कारवाई होत नसल्याच्या आशयाचा आरोप आदित्य यांनी केला होता.