Maharashtra Govt Formation BJP : महायुती सरकारसाठी दिल्लीत खलबतं, भाजप कोणती मंत्रिपदे सोडणार? समोर आली अपडेट

दिल्लीत अमित शाह यांच्या निवासस्थानी झालेल्या या बैठकीत एकनाथ शिंदे यांनी विविध प्रस्ताव सादर केले. मात्र, त्यावर भाजपने पर्याय दिला आहे. 'न्यूज 18 लोकमत'ला भाजपच्या सूत्रांनी दिलेल्या माहितीनुसार, भाजपने खातेवाटपाचा फॉर्म्युला सादर केला आहे. यानुसार, भाजपकडून एकनाथ शिंदे यांच्या नेतृत्वातील शिवसेनेला आणि अजित पवारांच्या राष्ट्रवादीला काही खाती सोडण्याचा निर्णय घेतला आहे. आज, दुपारी मुंबईत महायुतीच्या नेत्यांची बैठक होणार आहे.

महाराष्ट्राच्या विधानसभा निवडणुकीनंतर महायुतीची महत्त्वाची बैठक नवी दिल्लीमध्ये पार पडली. रात्री उशिरा एकनाथ शिंदे, अजित पवार, देवेंद्र फडणवीस यांची अमित शाह यांच्यासोबत तब्बल अडीच तास बैठक झाली. या बैठकीला भाजपचे अध्यक्ष जेपी नड्डाही उपस्थित होते. या बैठकीत मुख्यमंत्रिपद तसंच उपमुख्यमंत्रीपद आणि इतर महत्त्वाच्या खात्यांबाबत चर्चा झाली आहे.

सूत्रांनी न्यूज 18 लोकमतला दिलेल्या माहितीनुसार, भाजपकडे महत्त्वाची खाती आपल्याकडे ठेवणार आहे. एकनाथ शिंदे यांनी गृहखात्याची मागणी केली होती. मात्र, भाजपकडून त्याला नकार देण्यात आला आहे.

गृह, महसूल, ऊर्जा, ग्रामविकास, जलसंपदा, सार्वजनिक बांधकाम, गृह निर्माण, वन , ओबीसी मंत्रालय, पर्यटन , सामान्य प्रशासन ही खाती भाजप स्वतःकडे ठेवणार आहे.

एकनाथ शिंदे यांच्या शिवसेनेला नगरविकास, उद्योग, शिक्षण, सांस्कृतिक , पाणी पुरवठा , आरोग्य ,परिवहन, राज्य उत्पादन शुल्क ही खाती सोडण्यास भाजप तयार आहे.

अजित पवार यांच्या राष्ट्रवादीला अर्थ, महिला आणि बाल विकास, अल्पसंख्याक, मदत आणि पुनर्वसन, वैद्यकीय शिक्षण, आदिवासी विकास ,अन्न आणि नागरी पुरवठा ही खाती भाजप सोडण्याची शक्यता असल्याची माहिती सूत्रांनी दिली.