शी शी शी... नितेश राणेंना पाहून आदित्य ठाकरे यांनी तोंड फिरवलं, भास्कररावांचा हात पकडून घेऊन गेले

मुंबई : माजी केंद्रीय मंत्री, खासदार नारायण राणे यांचे सुपुत्र, महाराष्ट्राचे कॅबिनेट मंत्री नितेश राणे आणि माजी मुख्यमंत्री, शिवसेना पक्षप्रमुख उद्धव ठाकरे यांचे सुपुत्र, माजी मंत्री आदित्य ठाकरे यांच्यात वारंवार होणारे शा‍ब्दिक युद्ध, आरोप प्रत्यारोप संपूर्ण महाराष्ट्राला परिचित आहेत. एका युवतीच्या आत्महत्या प्रकरणात आदित्य ठाकरे यांचे नाव घेऊन नितेश राणे सातत्याने आरोप करतात. चौकशी यंत्रणांनी आदित्य ठाकरे यांना क्लिनचिट देऊनही नितेश राणे वारंवार लक्ष्य करताना दिसतात. कधी जाहीर सभांमधून, कधी विधिमंडळाच्या अधिवेशनातून तर कधी माध्यमांना प्रतिक्रिया देताना नितेश राणे हे आदित्य ठाकरे यांच्यावर शाब्दिक हल्ले करतात. कधी आदित्य ठाकरे उत्तर देतात तर कधी अनुल्लेखाने मारण्याचा प्रयत्न करतात. आजही असाच प्रत्यय विधिमंडळाच्या आवारात आला.