दोन भावांचं मनोमिलन, फडणवीस दिलेला शब्द पूर्ण करणार, सातारा जिल्ह्याला आणखी एक आमदार मिळणार

नुकत्याच झालेल्या लोकसभा, विधानसभा निवडणुकीमध्ये माण विधानसभा मतदारसंघातून भाजपचे आत्ताचे ग्रामविकास मंत्री जयकुमार गोरे यांचा मोठ्या मताधिक्याने विजय झाला. या विजयात मोठा वाटा त्यांचे बंधू भाजपचे नेते आणि सातारा जिल्हा मध्यवर्ती बँकेचे संचालक शेखर गोरे यांचा होता. या निवडणुकीच्या आधीपर्यंत या दोन्ही भावांमध्ये विधानसभेच्या जागेवरून मोठा वाद होता. परंतु मुख्यमंत्री देवेंद्र फडणवीस यांनी मध्यस्थी करून हा वाद मिटवून दोन्ही भावांना एकत्र आणले.

त्यानंतर विधानसभेच्या निवडणुकीत जयकुमार गोरे यांना मदत झाल्याने त्यांचा दणदणीत विजय झाला. त्यादरम्यान शेखर गोरे यांना आमदार करण्याचा शब्द देवेंद्र फडणवीस यांनी दिला होता. अखेर आता स्थानिक स्वराज्य संस्थांच्या निवडणुका झाल्यावर शेखर गोरे यांना ही जबाबदारी मिळण्याची दाट शक्यता वर्तवण्यात येते आहे.

याबाबत स्वतः शेखर गोरे यांनी एका जाहीर कार्यक्रमात वक्तव्य केला आहे. यावेळी बोलत असताना ते म्हणाले, "सप्टेंबरमध्ये स्थानिक स्वराज्य संस्थांच्या निवडणुका झाल्यानंतर शेखर गोरे आमदार होणार हे मी जबाबदारीने सांगतो. माझ्या कार्यकर्त्यांनी या मतदारसंघांमध्ये भाजपचा उमेदवार निवडून आणण्यासाठी रात्रीचा दिवस केला आहे आणि त्यामुळेच येणाऱ्या फेब्रुवारीच्या आसपास माझ्या कार्यकर्त्यांना नक्की न्याय मिळेल".

"कार्यक्रमाला येताना मला अनेक लोक विचारित होते की जयकुमार गोरे आमदार झाले? आपले काय? आपण कधी आमदार होणार? मी कार्यकर्त्यांना जबाबदारीने सांगतो, येत्या सप्टेंबर ऑक्टोबर महिन्यात स्थानिक स्वराज्य संस्थांच्या निवडणुका होतील. त्यानंतर महिन्याभरात स्थानिक स्वराज्य संस्था मतदारसंघातून विधानपरिषदेची निवडणूक होईल. या निवडणुकीत आपण नक्की आमदार होऊ", असे शेखर गोरे म्हणाले.