Abdul Sattar : आमदार अब्दुल सत्तार यांच्या पत्नी नफिसाबेगम यांचे निधन, माजी नगराध्यक्षांच्या निधनाने सिल्लोडमध्ये शोककळा

नफिसाबेगम यांनी केवळ कौटुंबिक जबाबदाऱ्याच पार पाडल्या नाहीत, तर सिल्लोड नगर परिषदेच्या नगराध्यक्षा म्हणून शहराच्या विकासात मोठे योगदान दिले. त्यांच्या कार्यकाळात स्थानिक समस्या सोडवण्यासाठी त्यांनी विशेष पुढाकार घेतला होता. आमदार अब्दुल सत्तार यांच्या प्रत्येक राजकीय संघर्षात आणि चढ-उतारात त्या त्यांच्या पाठीशी खंबीरपणे उभ्या राहिल्या. सत्तार यांच्या यशात नफिसाबेगम यांचा मोठा वाटा असल्याचे मानले जाते.

नफिसाबेगम यांच्या निधनामुळे सिल्लोडमधील जनतेने आपला एक आधारवड गमावल्याची भावना व्यक्त केली जात आहे. एक संयमी आणि कर्तृत्ववान महिला लोकप्रतिनिधी म्हणून त्यांची ओळख होती. त्यांच्या निधनानंतर विविध राजकीय पक्षांच्या नेत्यांनी आणि कार्यकर्त्यांनी शोक व्यक्त केला आहे.

नफिसाबेगम यांचे पार्थिव अंत्यदर्शनासाठी सिल्लोड येथील त्यांच्या निवासस्थानी ठेवण्यात आले आहे. त्यांच्या पश्चात पती आमदार अब्दुल सत्तार, मुले, सुना आणि मोठा आप्तपरिवार आहे. आज सकाळी १० वाजण्याच्या सुमारास सिल्लोड मध्ये त्यांच्या पार्थिवावर अंत्यविधी पार पडणार आहेत.