जिथे व्यापाऱ्यांनी मोर्चा काढला तिथेच राज ठाकरेंचा एल्गार, मराठीला आडकाठी करणाऱ्यांविरोधात ठाकरी तोफ धडाडणार

मुंबई : मुंबई शहरापासून काही किलोमीटर अंतरावर असलेल्या मिरा भाईंदर शहरात अमराठी व्यापाऱ्यांनी विराट मोर्चा काढून मराठी माणसांवर वरचढ होण्याचा प्रयत्न केला. मराठी शिकणार नाही असे सांगत त्याच मुद्द्यावरून मारहाण करणाऱ्यांना अटक करा, अशी अमराठी व्यापाऱ्यांची मागणी होती. प्रशासनाने देखील अमराठी व्यापाऱ्यांच्या मोर्चाला परवानगी दिली. मात्र प्रत्युत्तरादाखल मराठी मोर्चाला पहिल्यांदा परवानगी नाकारली. पण मराठीच्या रेट्यापुढे अखेर पोलीस प्रशासनाला एक पाऊल मागे येऊन मराठी मोर्चाला परवानगी द्यावी लागली. मात्र यादरम्यान पोलिसांनी मनसे नेते आणि कार्यकर्त्यांची धरपकड केली. मराठी मोर्चाला आडकाठी करण्याचा प्रयत्न पोलिसांनी केल्यानंतर मनसे अध्यक्ष राज ठाकरे यांनी थेट मिरा रोड आणि भाईंदरला जाण्याचे नियोजन केलेले आहे.