Nashik News: कुंभमेळ्यापूर्वी नाशिकमध्ये सापडली 125 वर्षे जुनी दुर्लभ गोष्ट, दहा फूट खोल असलेल्या वास्तूने वाढलं रहस्य

द्वारका सर्कल जवळ सुरू असलेल्या अंडरपासच्या बांघकामावेळी 125 वर्षे जुन्या पुरातन विहिरीचा शोध लागला आहे. द्वारका परिसरामध्ये अंडरपास उभारण्याचे काम सुरू आहे, हे काम सुरू असताना दगडी बांधकामाची जुनी विहीर समोर आलेली आहे. कामगार रस्त्याचे खोद काम करताना त्यांना तब्बल दहा फूट खोलीपर्यंत पोहोचल्यानंतर एक पूर्णपणे पाण्याने भरलेली आढळून आली. खोदकामामध्ये आढळून आलेल्या विहीरीचे बांधकाम 1903 साली करण्यात आल्याची माहिती काही स्थानिक नागरिकांनी दिली आहे. त्यामुळे या विहीरीला जवळपास 125 वर्षे जुना इतिहास असल्याचे बोलले जात आहे. जरीही इतकी वर्षे जुनी ही विहीर असली तरीही ती आजही स्वच्छ पाण्याने भरलेली आहे.

विहीरीचे बांधकाम स्वरूपात असून ते आजही अगदी भक्कम स्वरूपात आहे. आढळून आलेला हा पाण्याचा साठा शहराच्या मध्यवर्ती भागामध्ये आढळून आला असून भविष्यामध्ये जर नाशिककरांना पिण्याच्या पाण्याचा प्रश्न भेडसावला तर उपयुक्त ठरू शकतो. वाढते शहरीकरण आणि शहरातील वाढती लोकसंख्या पाहता सापडलेला पाण्याचा साठा आगामी काळामध्ये नाशिककरांसाठी फार महत्त्वाचा ठरू शकतो. शहरामध्ये अनेक ठिकाणी मोठ्या प्रमाणावर विकासकामे सुरू आहेत, त्यामुळे अनेक ठिकाणचे पाणीसाठे नष्ट होऊ लागले आहेत. अंडरपासच्या कामामध्ये ही विहीर आढळल्यामुळे आता एमआयडीसी आणि मनपा या विहिरीबद्दल काय निर्णय घेणार? हे पाहणं औत्सुक्याचं ठरणार आहे.