Nashik Crime: नाशिकमध्ये क्षुल्लक कारणावरून आपआपसात वाद, रिक्षा चालक गंभीर जखमी

नाशिक शहरातील सिडको परिसरामध्ये, गाडी मागे घेण्याच्या वादातून दोन अनोळखी व्यक्तींनी रिक्षा चालकावर धारदार शस्राने हल्ला केला आहे. पोलिसांनी दिलेल्या माहितीनुसार, घटनेमध्ये गंभीर जखमी झालेला 28 वर्षीय विशाल भदर्गे अंबड परिसरातील गौतम नगरमध्ये राहतो. रविवारी 15 मार्चला रात्रीच्या वेळी अंबड परिसरातील कारगिल चौकातून विशाल त्याची रिक्षा घेऊन जात होता. त्यावेळी वाहतुक कोंडी झाल्यामुळे त्याने त्याची रिक्षा पाठी घेतली. त्याने अचानक रिक्षा पाठी घेतल्यामुळे त्याचा दोन अनोळखी लोकांसोबत वाद झाला.

रिक्षा पाठी घेतल्यामुळे रिक्षा चालकाचा त्या दोन अनोळखी लोकांसोबत वाद झाला. वाहतुक कोंडी सुटल्यानंतर वाद तिथेच संपला सुद्धा, पण त्या दोन्हीही अनोळखी व्यक्तींनी रिक्षा ड्रायव्हरचा राग मनात धरून त्याचा पाठलाग केला. रिक्षाच्या मागे जात त्याला रस्त्यात पुढे थांबवलं. त्याला थांबवून रिक्षातून बळजबरीने खाली ओढून त्याच्यावर भररस्त्यात हल्ला केला. रिक्षा चालकाला खाली खेचून त्या अनोळखी लोकांनी त्याच्या डोक्यात आणि उजव्या हातावर लोखंडी रॉडने मारलं. तर दुसऱ्याने, कमरेत ठेवलेले धारदार शस्र काढून त्याच्या डाव्या खांद्यावर, बगलेजवळ आणि कमरेवर हल्ला केला. सोबतच त्याच्या रिक्षाच्या काचा सुद्धा त्यांनी फोडल्या.